काठमाडौं- माछापुच्छ्रे बैंकको सहायक कम्पनी माछापुच्छ्रे सेक्युरिटीज लिमिटेडको उद्घाटन भएको छ ।
नेपाल धितोपत्र बोर्डका अध्यक्ष रमेश हमालले माछापुच्छ्रे सेक्युरिटीजको उद्घाटन गरेका हुन् ।
उद्घाटन पश्चात् आयोजित कार्यक्रममा बोल्दै अध्यक्ष हमालले ब्रोकरले सरकारी कार्यालयको स्वीकृतबिना नै शाखा खोल्न सकिने व्यवस्था गरिएको बताएका छन् ।
‘ब्रोकरलाई शाखा खोल्नका लागि झन्झटमुक्त प्रणाली लागू गरिएको छ । अब हामीले कुनै सरकारी कार्यालय स्वीकृति लिन नपर्ने सिस्टम लागु गरेका छौ । १५ दिनभित्र अब ब्रोकरले शाखा बिस्तार गर्ने सक्छन् ।यसअघि ब्रोकर शाखा विस्तारका लागि १८-१९ महिना लाग्ने गरेको थियो। यसका साथै सरकारी कार्यालयबाट स्वीकृत लिन पनि झन्झट हुन्थ्यो तर, अब भने यस्ता सबै समस्याको अन्त्य गरिएको छ ।’
विभिन्न कानुनी प्रक्रिया र अदालतसँगको समेत सामना गरी यस्तो प्रणाली लागू गरिएको उनले बताए । आगामी दिनमा ब्रोकरको सेवा विस्तार र गुणस्तरमा सुधार हुने उनले दाबी गरेका छन् ।
पुँजी बजार सुधारका लागि यो एक नयाँ फड्को हुने र लगानीकर्ताको समस्या सहज र सरल रुपमा समाधान गर्न माछापुच्छ्रे सेक्युरिटीज सधैं अग्रसर हुने कम्पनीले जनाएको छ ।
कम्पनीको कार्यालय काठमाडौंको जमलमा रहेको छ । ग्राहकहरुको आवश्यकतालाई मध्यनजर गर्दै देश दुरदराजसम्म शाखा विस्तार गरी सेवा दिने कम्पनीले प्रतिवद्धता जनाएको छ ।
यो सेक्युरिटिजमा माछापुच्छ्रे बैंकको पूर्ण स्वामित्व छ । सेक्युरिटिजले ब्रोकरको मात्र कारोबार गर्न अनुमति पाएको हो । कम्पनीको चुक्ता पुँजी २० करोड रुपैयाँ छ ।
भर्खरै
लोकप्रिय
