झापा – पूर्वको पर्यटकीय स्थल दोमुखामा स्थापित होटलहरूले ढलको पानी सोझै पवित्र कनकाई नदीमा मिसाउने गरेका छन् ।
दैनिक हजारौं भक्तालु स्नान गर्नका लागि आउने गरेको कनकाई नदीमा होटलको ढलको पानी मिसाउने गरिएकोमा भक्तालु दुषित पानीले नुहाउन बाध्य छन् ।
पितृश्राद्ध गर्न आउने कतिपयले त्यही पानीले पीण्ड सामाग्री पकाउने गरेका छन् ।
पूर्वको कनकाई नदी पवित्र नदीको रुपमा परिचित छ । दैनिक हजारौं भक्तालु कनकाई नदीमा स्नान गर्नका लागि आउने गरेका छन् ।
आइतबार अपराह्न दोमुखास्थित कनकाई नदी तटमा पुग्दा धेरै परिवार पितृश्राद्धका लागि आएका थिए । तर जहाँ उनीहरू श्राद्ध गरिरहेका थिए, त्यहीँ छेउमा बनेको एउटा होटल दोमुखा रिसोर्टबाट निकालिएको ढलबाट फोहोर पानी बगिरहेको थियो । त्यही फोहोर पानीबाट दुर्गन्ध फैलिइरहेको थियो ।
त्यो पानीबाट दुर्गन्ध मात्र फैलिएको छैन, होटलबाट निकालिएको ढलको पानी सोझै पवित्र कनकाई नदीमा मिसिएको छ । एउटा होटलबाट मात्र होइन, टाढाबाट नदेखिने हिसाबले नदी किनारमा बनाइएका प्रत्येक होटलबाट ढलको पानी निकालेर सोझै नदीमा मिसाइएको छ ।
नदी किनारमा पितृकार्य गर्न आएका धेरैले दोमुखामा रहेका होटलहरूको उक्त गर्नै नहुने कामप्रति तीब्र असन्तुष्टि जनाएका छन् । तर, होटलबालाहरू खुलेर बोल्न चाहँदैनन् ।
दोमुखा पारिपट्टि धनुषकोटी धाम अवस्थित छ । विभिन्न मठमन्दिरसमेत रहेको पवित्र स्थानमा दोमुखाका होटलहरूको ढलको पानी सोझै नदीमा हाल्ने कामको चौतर्फी आलोचना भइरहँदा होटलवालाहरूले भने अस्थायी व्यवस्था गरेको बताएका छन् । दोमुखा रिसोर्ट प्रालिका सञ्चालक विरेन्द्र प्रकाश मैनालीले छेउको सडकमा नगरपालिकाले नाला बनाइदिएपछि नदीमा फोहोर पानी हाल्ने काम बन्दै गर्ने बताए ।
उनले भने, ‘दुई महिनामा यहाँ नाला बनिसक्छ होला । त्यसपछि ढलको पानी नालामा हाल्छौं ।’
नदीमा फोहोर फाल्न वा फोहोर तथा दुषित पानी सोझै हाल्न कानून पनि बर्जित गरेको छ ।
पवित्र तीर्थस्थलमा देखिएको नदी दुषित बनाउने यो श्रृंखला बन्द गराउन स्थानीय सरकारको ध्यान जान जरुरी रहेको स्थानीयबासीले बताएका छन् ।
पर्यटकीय दोमुखा क्षेत्र शिवसताक्षी नगरपालिकामा पर्छ । छिमेकी कनकाई नगरपालिकाका प्रमुख राजेन्द्र पोखरेलले त्यसरी फोहोर पानी सोझै नदीमा हाल्नु गलत भएको बताए ।
उनले भने, ‘यो सरासर गलत भयो । फोहोर उचित व्यवस्थापन हुनुपर्छ । यसरी त हुँदैन ।’
शिवसताक्षी नगरपालिकाका प्रमुख मेगाहाङ थोप्राले दोमुखा पर्यटकीय क्षेत्र विकास समितिका पदाधिकारीलाई उक्त समस्या समाधान गर्नका लागि निर्देशन दिने बताए ।
उनले भने, ‘सतहमै फोहोर पानी बगेर नदीमा मिसिनु गलत कुरा हो । यस्को समाधान म तुरुन्त निकाल्छु ।’
भर्खरै
लोकप्रिय
