झापा- कोशी प्रदेशका मुख्यमन्त्री केदार कार्की गत सोमबार मोरङको सुन्दरहरैंचास्थित साजिलाल माध्यमिक विद्यालयको वार्षिकोत्सवमा सम्बोधन गर्दै थिए । सोही कार्यक्रममा उनले गरेको सम्बोधनले अहिले सामाजिक सञ्जाल तातेको छ । त्यतिमात्र होइन, उनले गरेको भाषणकै कारण सामाजिक सञ्जालमा उनलाई गाली गर्नेहरूको भीड बढ्दै गएको छ ।
साजिलाल माविको ५८ औं वार्षिकोत्सवमा उनले भनेका थिए, ‘म फरक किसिमले सोचिरहेको छु । म पनि क्लासमा लास्ट बेञ्चमै बस्ने मान्छे हो । फर्स्ट बेञ्चमा बस्नेले त पढ्ने लेख्ने मात्रै जान्यो। कसरी लोकसेवा पास गर्ने र भूँडी भर्ने भन्ने मात्रै जान्यो । त्यो अहिले खरदार छ म मुख्यमन्त्री छु ।’
उनले उक्त कुरा बडो गर्वका साथ भनेका थिए । उनको भाषणको क्लिपमा उनको हाउभाउ हेर्दा लाग्छ ‘उनले संसार जितेका हुन् ।’
उनले फरि भने, ‘सर्टिफिकेटमा दिएको अंकले ज्ञानको मापन हुँदैन ।’ सामाजिक उनलाई प्रश्नको ओइरो लागेको छ ‘के उसो भए सबैखाले परीक्षा खारेज गरिदिने हो त!’
गरेको भाषण बासी हुनुभन्दा झन् साजी(ताजा) भएर सामाजिक सञ्जालमा भाइरल हुन पुगेको छ ।
प्रदेशको मुख्यमन्त्री जस्तो पदमा रहेर यस्ता कुरा बोलेकाले मानिसहरू अचम्ममा पर्नु स्वाभाविक हो । धेरैले उनको अभिव्यक्तिलाई अनपेक्षित मानेका छन् ।
केही दिन अघि झापाको बिर्तामोडमा भएको कार्यक्रममा पनि उनले ‘म श्याम बाबाको मन्दिर गएर आएपछि मुख्यमन्त्री भएको हुँ’ भन्ने अभिव्यक्ति दिएका थिए । मुख्यमन्त्री बनेलगत्तै उनी माध्यमिक तह पढेको विद्यालयको खेलमैदानमा पुगेर ‘तपाईहरूको भाइभतिजो मुख्यमन्त्री भयो, अब सीडीओ, सचिवलाई आदेश दिन्छ’ भनेका थिए । बारम्बार यस्ता अभिव्यक्ति दिएका कारण उनी अहिले आलोचित बन्न पुगेका छन् ।
मोरङकै विभिन्न विद्यालयका फर्स्ट बेञ्चरहरू देश विदेशमा उच्च तहमा रहेका काम गरिरहेका बारेमा मुख्यमन्त्री कार्की अनभिज्ञ छन् । मोरङको विभिन्न विद्यालयका फर्स्ट बेञ्चरहरू कोही अमेरिकाको मेरील्याण्ड राज्यको मेडस्टार युनियन मेमोरियल हस्पिटलमा रेसिडेन्ट फिजिसियन छन् भने कोही अन्य हस्पिटलमा ख्याति कमाएका चिकित्सक छन् । उदाहरणका रुपमा राकेश गिरी र अरुण कालिकोटेको नाम लिन सकिन्छ ।
काठमाडौं तथा देशका अन्य जिल्लाका विद्यालयबाट एसएलसीमा बोर्ड भएकाहरू देश/विदेशमा ख्याति कमाइरहेका छन् । प्रदेश सरकारकै मातहतमा रहेको कोशी अस्पतालमा पनि दुई जना चिकित्सक रहेका छन् ।
विराटनगरको एउटा अनलाइनको फेसबुक पेजमा हालिएको मुख्यमन्त्री कार्कीको भिडियोमा यो सामाग्री तयार पार्दासम्म ७ सय ७२ प्रतिक्रिया छन् । त्यस्मा अधिकांशले मुख्यमन्त्री कार्कीलाई गाली गरेका छन् ।
शिक्षा क्षेत्रमा लामो समय क्रियाशील रहेका व्यक्तिहरूले पनि मुख्यमन्त्री कार्कीको भनाइप्रति असन्तुष्टि जनाएका छन् । उनीहरूले मुख्यमन्त्री कार्कीको भनाइले विद्यार्थीलाई पढाईप्रति ‘डिमोटिभेट’ गर्ने बताए ।
संस्थागत विद्यालयहरूको संगठन प्याब्सनका पूर्व केन्द्रीय अध्यक्ष टिकाराम पुरीका अनुसार मुख्यमन्त्री जस्तो मान्छेले सार्वजनिक अभिव्यक्ति दिँदा विवेक अपनाउनु पर्छ । पुरीले भने, ‘उहाँले कुन आशयले भन्नु भएको हो उहाँलाई नै थाहा होला । तर उहाँको भनाइ मिलेन जस्तो लाग्छ मलाई । उहाँको बुझाइ के हो उहाँ नै जान्नु हुन्छ ।’
भर्खरै
लोकप्रिय
