झापा- लागुऔषधको प्रयोग र ओसारपसारमा अग्रणी जिल्लाका रुपमा झापालाई चिनिन थालिए पनि स्थानीय सरकार प्रमुखहरू भने यसतर्फ गम्भीर बन्न सकेका छैनन् ।
लागुऔषधको प्रयोगले देश नै तहसनहस अवस्थामा पुगिरहँदा सीमावर्ती झापाका पालिकाका प्रमुखहरू ‘कानमा तेल हालेर’ बसेका छन् । प्रहरी प्रशासनले लागुऔषध नियन्त्रणमा हातेमालो गर्न खोज्दासमेत सहकार्य गर्न उनीहरू अनिच्छुक देखिएका हुन् ।
जिल्ला प्रहरी कार्यालय झापा र नेपाल प्रहरीको लागुऔषध नियन्त्रण ब्यूरो काठमाडौँले मंगलबार बिर्तामोडमा समुदाय प्रहरी साझेदारीअन्तर्गत लागुऔषधसम्बन्धी अभिमुखीकरण कार्यक्रम राखेका थिए ।
अभियानका रुपमा संचालन गर्ने उद्देश्यले आयोजित त्यस कार्यक्रममा झापाका १५ वटै पालिकाका प्रमुख, उपप्रमुख र वडाध्यक्षहरूलाई बोलाइएको थियो । त्यस महत्त्वपूर्ण कार्यक्रममा केही जनप्रतिनिधि मात्र उपस्थित भए । लागुऔषधको प्रयोग र ओसारपसारको विकराल समस्या उनीहरूको प्राथमिकतामा पर्न सकेन ।
कार्यक्रममा जनप्रतिनिधि, विभिन्न संघ संस्थाका प्रतिनिधि, स्वास्थ्यकर्मी, कर्मचारी गरी ३५० जनालाई बोलाइएको थियो । तर, कार्यक्रममा त्यसको आधा पनि उपस्थित भएनन् ।
कार्यक्रममा मेचीनगर नगरपालिकाका प्रमुख गोपालचन्द्र बुढाथोकी, दमक नगरपालिकाका प्रमुख राम थापा, अर्जुनधारा नगरपालिकाका प्रमुख बलदेवसिंह गोम्देन र भद्रपुर नगरपालिकाका प्रमुख गणेश पोखरेल मात्र उपस्थित भए ।
मेचीनगरका प्रमुख बुढाथोकी र दमकका प्रमुख थापा कार्यक्रम सकिनुअगावै निस्किएका थिए भने भद्रपुरका प्रमुख पोखरेल केही ढिलो गरी कार्यक्रम हलमा प्रवेश गरेका थिए ।
उपप्रमुखहरूमा बिर्तामोडका नगेन्द्रप्रसाद संग्रौला, दमककी रेगिना भट्टराई प्रसाई, कनकाईकी आशा शर्मा शिवाकोटी, गौरीगञ्ज गाउँपालिकाकी पुजन न्यौपाने कुँवर र हल्दिवारी गाउँपालिकाकी लक्ष्मीदेवी मैनालीको उपस्थिति रहेको थियो ।
कार्यक्रममा गौरादह, शिवसताक्षी, बाह्रदशी, कमल, कचनकवल, बुद्धशान्ति र झापा गाउँपालिकाबाट कोही पनि आएन । जिल्लाभरिका सुरक्षा निकायका प्रमुख र सुरक्षा अधिकारीहरूको सहभागिता रहेको कार्यक्रमप्रति जनप्रतिनिधिहरुले खासै चासो नदिँदा कार्यक्रम सञ्चालन गर्नुको उद्देश्य पूरा हुन सकेन ।
समाजमा व्याप्त लागुऔषध प्रयोग र ओसारपसार नियन्त्रणमा स्थानीय सरकारको मुख्य भूमिका हुनुपर्ने झापाका प्रहरी प्रमुख, प्रहरी उपरीक्षक मिलन केसीले बताए ।
उनले प्रहरी र स्थानीय तहले संगै सहकार्य गर्दा मात्र लागुऔषध नियन्त्रण गर्न सकिने धारणा राखे । समाजका सरोकारवाला निकाय, राजनीतिक दल, तिनका भ्रातृ संस्था, सामाजिक संघ संस्था, पत्रकारलगायतको सहयोगमा मात्र लागुऔषध नियन्त्रणको अभियान सफल हुनसक्ने प्रहरी उपरीक्षक केसीले बताए ।
भौतिक पूर्वाधारको निर्माणमा मात्र ध्यान नदिई मानवीय विकास र सचेतनामूलक कार्यक्रमलाई पनि प्राथमिकतामा राख्न उनले जनप्रतिनिधिहरूलाई आग्रह गरे ।
कार्यक्रमलाई सहजीकरण गर्दै लागुऔषध नियन्त्रण व्युरो काठमाडौँका प्रहरी वरिष्ठ उपरीक्षक गोविन्द थपलियाले देशमा लागुऔषधको अवस्थाबारे जानकारी दिएका थिए ।
पालिकाका जनप्रतिनिधिले समाज जोगाउने महत्व राखेको कार्यक्रमलाई ध्यान नदिए देखेर युवा संघकी नेतृ रोजिना पाण्डेले निकै व्यङ्ग्य हानिन् ।
उनले भनिन्, ‘जनप्रतिनिधिहरू निकै व्यस्त हुनुहुँदो रहेछ । यो कार्यक्रमलाई कतिको प्राथमिकता दिनुहुन्छ भन्ने प्रष्ट भयो ।’
लागुऔषध नियन्त्रण व्युरो काठमाडौँका प्रहरी वरिष्ठ उपरीक्षक थपलियाको केही समयको यो प्रस्तुतिपछि कार्यक्रम हलमा करिब प्रहरीमात्र देखिएका थिए । पालिकाका प्रमुख तथा उपप्रमुख बोल्ने बेलामा हल करिब खाली भइसकेको थियो । त्यहीबीचमा पनि लागुऔषध नियन्त्रणमा अर्जुनधारा नगरपालिकाका प्रमुख बलदेव गोम्देनले नगरपालिका कार्यालयले धेरै काम गरेको दाबी गर्न भ्याए ।
भर्खरै
लोकप्रिय
