वीरगञ्ज – पर्सा राष्ट्रिय निकुञ्जमा तीन वटा बाघ मरेको घटनाको विषयमा कार्यालयको ध्यानाकर्षण भएको जनाएको छ।
निकुञ्जको कार्यालय आधाभारले निकुञ्जमा तीन वटा बाघ मरेको विषयमा विभिन्न सञ्चार माध्यममा आएको समाचारप्रति ध्यानाकर्षण भएको जनाउँदै बाघको मृत्यु भएको बारे प्रेस विज्ञप्ति जारी गरी जानकारी गराएको छ।
विगत ६ महिनमा उद्धार गरेर निकुञ्जको कार्यालयमा रहेको खोरमा राखिएको तीन वटा बाघ मरेकोमा सबै बाघको उमेर बढी भएको तथा शरीरमा घाउ चोटपटक भएकाले मृत्यु भएको निकुञ्जका सूचना अधिकारी सन्तोष भगतले जानकारी दिए।
गत वर्ष भदौ १६ गते पर्साको ठोरी गाउँपालिका–५ आठघरेबाट १२ वर्षको बाघलाई नियन्त्रणमा लिइएको थियो। उक्त बाघले एक जनाको ज्यान लिएको तथा गोरुलाई पनि मारेको थियो।
पातलो दुब्लो शरीर, घाँटी र पञ्जामा चोट रहेको उक्त बाघको असोज २५ गते निकुञ्जको खोरमा मृत्यु भएको थियो। यस्तै, गत वर्ष असार २३ गते चितवन राष्ट्रिय निकुञ्जको क्षेत्रबाट नियन्त्रणमा लिइएको १० वर्ष उमेर भएको बाघको शरीरमा सामान्य चोटपटक रहेको तथा बढी उमेर भएकाले उक्त बाघको चैत १६ गते मृत्यु भएको सूचना अधिकारी भगतले जानकारी दिए।
त्यस्तै, १२ वटा बाख्रा र दुई वटा भैँसी मारेको बाघलाई ०७९ साल चैत २२ गते नियन्त्रणमा लिइएको बाघको अनुहारमा सात सेन्टिमिटरको गहिरो घाउ र उमेर बढी भएको तथा घाउ पनि भित्रबाट संक्रमण फैलिएर सोही कारण मृत्यु भएको भगतले बताए। पर्सा राष्ट्रिय निकुञ्जमा उचित स्याहार सुसार अभावमा पनि त्यहाँस्थित खोरमा राखिएको बाघको मृत्यु हुने गरेको छ।
भर्खरै
लोकप्रिय
