बाजुराबाट रारा जाँदै गरेको जीप दुर्घटना हुँदा १२ जना घाइते

मुगु – बाजुराबाट रारातर्फ जाँदै गरेको जीप दुर्घटना हुँदा चालकसहित १२ जना घाइते भएका छन्।

बिहीबार बाजुरा जिल्लास्थित हिमाली गाउँपालिका– ५ कोल्टीमा रहेको भवानी माध्यामिक विद्यालयका विद्यार्थीलाई रारा घुमाउन जाँदै गरेको ग १ ज ८२४९ नम्बरको जीप मुगुको खत्याड गाउँपालिका–२ जाम हिलटप भन्ने स्थानमा दुर्घटना भएको हो। जीप सडकबाट २५ मिटर तल खसेको थियो।

घाइते हुनेहरुमा ९ जना विद्यार्थी, २ शिक्षक र चालक रहेको र घाइतेमध्ये चालकबाहेक सबैको अवस्था सामान्य रहेको प्रहरी नायव उपरीक्षक वीरेन्द्र थापाले जानकारी दिए।

चालक लालबहादुर भण्डारीको स्थानीय स्वास्थ्य चौकीमा उपचार भइरहेको प्रहरीले जनाएको छ।