काठमाडौं- राष्ट्रिय खेलकुद परिषद् (राखेप) ले नेपाल क्रिकेट संघ (क्यान) लाई अमेरिका र वेस्ट इन्डिजमा जारी टी-२० विश्वकप क्रिकेटमा नेपाली राष्ट्रिय टोलीको विश्वकप प्रदर्शनमा पूर्णरुपले केन्द्रीत गर्न-गराउन निर्देशन दिएको छ।
पछिल्लो समय खेलाडीहरुलाई प्रतियोगिता नजिकिंदा र प्रतियोगिता सुरु भएपछि पनि विभिन्न कार्यक्रमहरुमा सहभागिता गराउने तथा नेपालीहरुका विभिन्न संस्थाहरुले ‘मिट एन्ड ग्रिट’ कार्यक्रमहरुमा सहभागिता जनाउने गरेको भन्दै राखेपले क्यानको ध्यानआकर्षण गराएको हो।
राखेपले भनेको छ ‘विश्वकप क्रिकेटमा सहभागी नेपाली टोली प्रतियोगिताको तयारीमा पूर्णरुपले केन्द्रीत भइ उच्चस्तरीय प्रदर्शनका लागि आवश्यक प्रशिक्षणलगायतका कार्यहरु गर्नु पर्ने समयमा नेपाली समाजको नाममा विभिन्न स्थानमा प्रतियोगिताको सम्मुख आयोजना भएका ‘मिट एन्ड ग्रिट’ कार्यक्रममा राष्ट्रिय टिमका खेलाडीहरुलाई सहभागी गराउनाले टिमको व्यवसायिक स्तरको विषयमा चासोका सन्दर्भमा राखेपको गम्भीर ध्याणाकर्षन भएको छ।’ राखेपले क्यानलाई लेखेको पत्रमा उल्लेख छ।
राखेपले अन्य व्यक्ति तथा संस्थाले आयोजना गर्ने कुनैपनि खालका कार्यक्रममा सहभागी नहुन-नगराउन तथा आफ्नो खेलमा पूर्णरुपमा केन्द्रीत भइ आवश्यक कार्यका लागि क्यानलाई निर्देशन दिएको छ। साथै राखेपले आगमी प्रतियोगिताहरुमा उच्च खेल प्रदर्शनका लागि समेत शुभकामना दिएको छ।
भर्खरै
लोकप्रिय
