झापा- जंगली हात्ती गाउँ पसेर स्थानीयबासीको धनमालमा क्षति गर्न थालेपछि बिर्तामोड नगरपालिकाले पनि स्थानीयबासीलाई जोगाउन भन्दै सौर्य ऊर्जामा आधारित विद्युतीय तारबार निर्माण गर्न सुरु गरेको छ।
हात्तीलाई गाउँ पस्नबाट रोक्नका लागि राष्ट्रिय प्रकृति संरक्षण कोषले बिर्तामोडको वडा नम्बर ६, ७ र ८ मा सोलार ईलेक्ट्रिक फेन्सिङ निर्माणको काम सुरु गरेको हो।
वडा नम्बर ६ को देउनीया पुलदेखि वडा नम्बर ८ स्थित किसनभिट्टासम्मको ९ किलोमिटर क्षेत्रमा तारबार निर्माण हुन लागेको कोषले जनाएको छ। तारबार निर्माण कार्यको बिर्तामोड नगरपालिकाकी प्रमुख पवित्रा महतारा प्रसाईले बिहीबार शिलान्यास गरिन्।
शिलान्यास कार्यक्रममा बोल्दै नगर प्रमुख प्रसाईले हात्ती नियन्त्रणका लागि विद्युतीय तारवार प्रभावकारी हुने बताइन्। उनले बढ्दो मानवीय क्षति कम गर्नका लागि विद्युतिय तारबार फलदायी हुने अपेक्षा राखिन्।
हात्तीका लागि मनपर्ने आहारा व्यवस्थापन गर्न पनि स्थानीय सरकार र सामुदायिक वन उपभोक्ता समिति लाग्नु पर्ने उनले बताइन्।
१ करोड ३२ लाख ३६ हजार ५ सय २० रुपैयाँको लागतमा तारबार निर्माण हुन लागेको हो। यसको ठेक्का फुङ्फुङ्गे शैलेश्वरी निर्माण सेवाले लिएको छ। ठेक्का सम्झौता अनुसार २०८१ कात्तिक २९ गतेसम्ममा योजना सम्पन्न गर्नु पर्नेछ।
संरक्षण कोषका कोशी प्रदेश प्रमुख विरेन्द्र गौतमका अनुसार सुरुमा बाहुनडाँगीको १८ किलोमिटर क्षेत्रमा विद्युतिय तारबार निर्माण गरीएको थियो।
अहिलेसम्म झापाको जलथल र चाराआलीमा क्षेत्रसमेत गरी ७६ किलोमिटर क्षेत्रमा विद्युतीय तारबार निर्माण भइसकेको जानकारी दिए।
भर्खरै
लोकप्रिय
