काठमाडौँ – गोरखा मिडिया नेटवर्कका तत्कालीन शेयर सदस्यसमेत रहेका प्रबन्ध निर्देशक रवि लामिछानेले संस्थामा कहाँबाट पैसा आयो आफूलाई जानकारी नभएको बताएका छन्।
शुक्रबार सहकारीको रकम हिनामिनाबारे छानबिन गर्न गठित संसदीय समितिसमक्ष आफ्नो जिम्मेवारी प्रशासनिक तहमा मात्रै भएकाले कम्पनीमा आएको पैसाबारे जानकारी नभएको बयान दिएका हुन्।
लामिछाने गोरखा मिडियामा शेयर सदस्य तथा निर्देशक हुँदा विभिन्न सहकारीबाट अवैध रुपमा ८० करोडभन्दा बढी रकम आएको तथ्य सार्वजनिक भएको छ। तर, लामिछानेले छानबिन समितिसमक्ष पैसा स्रोतबारे अध्यक्ष जिवी राईलाई नै जानकारी हुने उल्लेख गरेको समितिका एक सदस्यले जानकारी दिए।
लामिछानेले समितिमा दिएको बयानबारे जानकारी दिँदै सभापति सूर्य थापाले भने, ‘आफू संस्थाको प्रबन्ध निर्देशकका रूपमा संस्थामा सामान्य रूपमा दैनन्दिन प्रशासकीय आन्तरिक काममा संलग्न रहेको तर कार्यकारी प्रमुखको रूपमा आर्थिक स्रोत जुटाउनेलगायतका कामहरु जिवी राईले गर्ने गरेको हुनाले कहाँबाट कसरी रकम प्राप्त भयो भन्ने जिवी राईलाई थाहा हुने विषय राख्नुभएको छ।’
लामिछानेले आफ्नो नाममा प्रवाह गरिएको भनिएको रकममा हस्ताक्षर नगरेको दाबी गरेका छन्। थापाले भने, ‘उहाँले कागजात नागरिकतासहितका चिजहरू समावेश नभएको स्पष्ट गर्नुभएको छ।’
भर्खरै
लोकप्रिय
