झापा- झापाको बिर्तामोडबाट तीन जना बेसहारा नागरिकको उद्धार गरिएको छ। मानव सेवा आश्रमको सहयोगमा एक जना वृद्धासहित तीन जनाको उद्धार गरिएको हो।
मानव सेवा आश्रमका प्रतिनिधि, नगर प्रहरीसहित नगर उप-प्रमुख नगेन्द्र प्रसाद संग्रौलाको टोलीले सोमबार दिउँसो उनीहरूको उद्धार गरेको हो।
बिर्तामोड- ४ बाट ९० वर्षीय छबिलाल तिम्सिना, बिर्तामोड- ३ बाट १८ वर्षीय उजित सिंह र बिर्तामोड- ६ बाट २२ वर्षीय विनिशा गौतमलाई उद्धार गरिएको हो।
बृद्ध तिम्सिनालाई विगत धेरै दिनदेखि बिरामी रहेको र कटेरोमा सुतेको अवस्थामा उद्धार गरिएको हो। उनका आफन्त यहाँ कोही नभएकोले स्थानीयले उनलाई खानपिन गराउँदै आएका थिए।
यस्तै, सिंह सैनिकमोडको एउटा निर्माणधिन घरमा रात कटाउँदै आएका थिए। मानसिक अवस्था ठीक नभएका सिंहले कहिले काँकरभिट्टाको गरामनी कहिले भारतको पानीटंकी घर बताउने गरेका छन्।
यसैगरी, गौतमको पनि मानसिक अवस्था ठीक छैन। बुट्टाबारी नजिकै शुभबिहानी टोलबाट उद्धार गरिएकी उनले मोरङको गछिया आफ्नो ठेगाना बताएकी छन्।
उद्धार गरिएका सबैलाई बिर्तामोड नगर प्रहरीको गाडीमा राखेर मानव सेवा आश्रम मेचीनगर पठाइएको नगर उपप्रमुख नगेन्द्रप्रसाद संग्रौलाले जानकारी दिए।
उनले यस प्रकारका बेसाहारा नागरिक बिर्तामोड क्षेत्रमा कोही भेटिए उद्धार गरिने पनि जानकारी दिए।
भर्खरै
लोकप्रिय
