वीरगञ्ज – वीरगञ्जस्थित एकीकृत भन्सार जाँच चौकी (आईसीपी)स्थित सडकखण्ड स्थानीयले अवरुद्ध गरेका छन्।
बिहीबार ट्यांकरको ठक्करबाट वीरगञ्ज महानगरपालिका–१७ अलौ टोलका एक युवकको मृत्यु भएपछि मृतकका परिवार र स्थानीयले सडकखण्ड अवरुद्ध गरेका हुन्।
शुक्रबार बिहानैदेखि मृतकका परिवार र स्थानीयबासीहरुले सडकमा टायर बालेर विरोध प्रदर्शन गरेका कारण उक्त सडकखण्ड भएर चल्ने मालबाहक सवारीसाधनहरु रोकिएका छन्।
आईसीपी भन्सारबाट छुटेका मालबाहक सवारीसाधनहरु स्थानीयको प्रदर्शनका कारण सडक र आईसीपी भन्सारमै रोकिनु परेको छ।बिहीबार आइसिपीस्थित सडकखण्डमा ना ६ ख ७५०३ नम्बरको ट्यांकरले ना २९ प ६९५१ मोटरसाइकललाई ठक्कर दिँदा वीरगञ्ज–१७ अलौंका २२ वर्षीय टिनुकुमार साह तुराहा गम्भीर घाइते भएका थिए। उपचारको क्रममा अबेर राति उनको मृत्यु भएको थियो।
आफन्त र स्थानीयले ट्यांकर चालकको लापरबाहीका कारण मृत्यु भएको भन्दै क्षतिपूर्ति र चालकलाई कारबाहीको माग गरेका छन्। अहिले घटनास्थलमा प्रहरी परिचालन गरिएको छ।
भर्खरै
लोकप्रिय
