वीरगञ्ज- गत कार्तिक १ गते बिहीबार बाराको प्रसौनी गाउँपालिकास्थित नहरको डिलमा मृत अवस्थामा भेटिएका वीरगञ्जका युवक २६ बर्षीय बरेन्द्र साह सोनारको हत्यामा संलग्न मुख्य अभियुक्त भनिएकालाई बारा प्रहरीले पक्राउ गरेको छ ।
उनको हत्यामा संलग्न रहेका मुख्य अभियुक्त भारत रक्सौल निवासी बिजय गुप्तालाई प्रहरीले पक्राउ गरेको हो । गुप्तालाई मंगलबार राति पर्सा वीरगञ्ज महानगरपालिका-१६ ईनर्वाबाट पक्राउ गरिएको बाराका प्रहरी प्रवक्ता एवम् डिएसपी प्रकाश सापकोटाले जानकारी दिए ।
पक्राउ परेका गुप्ता नै घटनाको मुख्य अभियुक्त भएको भनि प्रारम्भिक अनुसन्धानबाट खुलेको उनले बताए । मृतक सोनारकी श्रीमती मनिषा देबी पनि सोधपुछको लागि प्रहरी हिरासतमै रहेको सापकोटाले बताए ।
‘घटनाको मुख्य अभियुक्त विजय नै हुन्। उनलाई पक्राउ गरिसकेका छौं। अझै थप अनुसन्धान गर्न बाँकी नै छ, ‘ उनले भने, ‘मृतककी श्रीमती पनि प्रहरी नियन्त्रणमा नै हुनुहुन्छ ।’ सोनारको शव भेटिएको दिन नै प्रहरीले मनिषालाई सोधपुछको लागि नियन्त्रणमा लिएको थियो ।
मृतक सोनारको घरमा डेरा गरि बस्ने बिजय र वीरेन्द्र गत असोज २७ गते आइतबार साँझ साढे ५ बजे बारास्थित मुसहर्वामा लागेको मेलमा हेर्न गएका थिए ।
सोही राति साढे १२ बजे विजय मेलाबाट फर्केको तर वीरेन्द्र नफर्केपछि परिवारजनले खोजी गरेका थिए । तर सोनारको शव कार्तिक १ गते बिहीबार नहरको डिलमा भेटिएको थियो ।
यसबीचमा बिजय घरबाट फरार भएका थिए । शव भेटिएपछि मृतक सोनारका परिवारजनले बिजयले नै हत्या गराएको आरोप लगाएका थिए ।मृतकका दाई सुरेन्द्रले बुहारी मनिषाले बिजयसित भाइको बारेमा सोधपुछ गर्दा उल्टै बिजयको बचाउ गरेको बताएका थिए ।
जसका कारणले बिजय र मनिषाकै मिलेमतोमा आफनो भाइको हत्या भएको सुरेन्द्रको आशंका छ । वीरेन्द्रको घरमा डेरा गरि बस्ने विजयको मनिषासित बिबाहेतर सम्बन्ध रहेको परिवारजनको भनाइ छ ।
सोही कारणले वीरेन्द्रको हत्या विजयले नै गरेको हुनसक्ने भन्दै परिवारजनले घटनाको सुक्ष्म अनुसन्धान गरि सत्य तथ्य बाहिर ल्याउनु पर्ने बताउँदै आएका छन् ।
भर्खरै
लोकप्रिय
