युट्युबमा १७ वटा रुसी मिडिया आउटलेटहरूलाई प्रतिबन्ध लगाइएको कारण रुसले युट्युबको मातृ कम्पनी गुगललाई २० डेसिलियन डलर जरिवाना गराएको छ। उक्त जरिवानाको रकम विश्वको सम्पूर्ण कुल ग्राहस्थ उत्पादन भन्दा बढी हुन आउँछ।
आरबीसीको रिपोर्ट अनुसार गुगललाई लगाइएको जरिवाना युट्युबमा १७ वटा रुसी मिडिया च्यानलहरूको सामग्रीमा प्रतिबन्ध लगाउनुसँग सम्बन्धित छ।
यो मुद्दा सन् २०२० मा सुरु भएको थियो, तर युक्रेनविरुद्ध रुसको आक्रमण बढेपछि यो मुद्दाले व्यापकता पाएको हो। अहिले अधिकांश पश्चिमी कम्पनीहरू रुसबाट बाहिरिएका छन् र त्यहाँ व्यापार गर्न पनि प्रतिबन्धहरू कडा पारिएको छ।
रुसी मिडिया आउटलेटहरूलाई युरोपमा पनि प्रतिबन्ध लगाइएको छ, जसका कारण मस्कोले प्रतिशोधका कदमहरू उठाएको छ।
सन् २०२२ मा गुगलको स्थानीय शाखा दिवालिया घोषित गरिएको थियो र कम्पनीले रुसमा विज्ञापन जस्ता व्यावसायिक सेवाहरू प्रदान गर्न रोक्यो। तर, रुसमा गुगलका उत्पादनहरू पूर्ण रूपमा प्रतिबन्धित छैनन्।
यो घटनाले रुस र अमेरिकी प्रविधि कम्पनीबीचको हालको तनावलाई जनाउँछ। मे २०२१ मा रुसको मिडिया नियामक रोस्कोमनाड्जोरले गुगलमाथि युट्युबमा रुसी मिडिया आउटलेटहरू, जस्तै आरटी र स्पुटनिकको पहुँच सीमित गरेको आरोप लगाएको थियो र “अवैध विरोध गतिविधि”लाई समर्थन गरेको भनेको थियो।
त्यसपछि जुलाई २०२२ मा रुसले गुगललाई युक्रेनको युद्धका बारेमा “प्रतिबन्धित” सामग्रीको पहुँच सीमित गर्न असफल भएको भन्दै २१.१ अरब रुबल (£३०१ मिलियन) जरिवाना गर्यो।
रुसमा प्रेस स्वतन्त्रता लगभग छैन र स्वतन्त्र समाचार आउटलेटहरू र अभिव्यक्ति स्वतन्त्रता गम्भीर रूपमा दबाइएका छन्।
भर्खरै
लोकप्रिय
