वीरगञ्ज- गण्डक नहरमा रहेको भासिएको पुलबाट दैनिक जोखिम मोलेर हजारौं सर्वसाधारण तथा यात्रुहरू आवत जावत गर्न बाध्य भएका छन् ।
पर्साको सदरमुकाम वीरगञ्ज महानगरपालिका र बहुदरमाई नगरपालिकाको सिमानामा पर्ने तिलावे नदिमाथि बनेको गण्डक नहरको भासिएको पुलबाट स्थानीयहरु जोखिम मोलेर आवत जावत गर्दै आएका हुन् ।
नहरमा रहेको पुरानो पुल गएको भदौमा भासिएको थियो। समान्य बाढीमा पनि पुरानो पुल भासिएको हो । सो पुलमा रहेको एउटा पिल्लर भासिएर क्षतिग्रस्त भइसकेको छ । पिल्लर क्षतिग्रस्त भएपछि पुल नै अहिले कुनै पनि बेला टुटेर खस्ने अवस्थामा छ । तर पिल्लर टुटेर खस्नै लागेको पुलबाट नै यात्रुहरू: पैदल, साइकल र मोटरसाइकलमा आवत जावत गर्दै आएका छन् ।
दैनिक रुपमा अहिले हजारौंको संख्यामा पैदल तथा साइकल, मोटर साइकल यात्रुहरु भासिएको क्षतिग्रस्त अवस्थामा रहेको पुल प्रयोग गरेर नै आवतजावत गरिरहेका छन् । गण्डक नहरको बाटो भएर सदरमुकाम वीरगञ्जलाई ठोरीसम्म जोड्ने गरेको छ । गण्डक नहर कै बाटो प्रयोग गरेर सदरमुकामसम्म आवतजावत गरिने मुख्य बाटो नहरकै भएकोले उक्त बाटोमा रहेको क्षतिग्रस्त पुलबाट नै जोखिम मोलेर यात्रुहरु आवतजावत गर्दै आएका हुन् ।
क्षतिग्रस्त पुलबाट आवत-जावत गर्दा पुल टुटेर ज्यानै जाने जोखिम भएपनि आवतजावत गर्न स्थानीयले छोडेका छैनन् । एकले अर्कोलाई देखेर क्षति ग्रस्त पुलबाट नै सर्ब सधारणहरु यात्रा गर्दै आएको वीरगञ्ज महानगरपालिका- २७ का रमन दासले बताए ।
यात्रा गर्दा जोखिम रहेको भएपनि पुल बाहेक अर्को विकल्प नभएकाले बाध्यताका साथ हजारौं यात्रुहरुले क्षतिग्रस्त पुलबाट नै आवतजावत गरिरहेको उनले बताए । पचासौं वर्ष पुरानो पुलको मर्मतसमेत नभएकाले पुलको पिल्लर दुई टुक्रा भएको दासको भनाइ छ ।
पुल क्षति ग्रस्त भएपछि केही महिना पहिले पुल नजिकै बैकल्पिक बाटो बनाइएको छ ।
नदीको पानीमाथि ह्युम पाइप राखी माटो पुरेर बनाइएको बाटो प्रयोग गरेर ठूलो गाडीहरू ओहोरदोहोर गर्ने गरेका छन् । गाडीको चाप बढी भएकोले खेतीपातीको लागि खेतमा जान पनि थुप्रै किसनहरु लामो दूरीको बाटो प्रयोग गर्नुपर्ने बाध्यता रहेको दासले बताए । पुल क्षति भएर कुनैपनि बेला टुट्न सक्ने भएपनि जनप्रतिनिधि र नेता कसैले पनि पुल बनाउनमा पहल नगरी निरीक्षण मात्रै गर्न आउने गरेको उनको भनाइ छ ।
पुल क्षति ग्रस्त भएपछि पुलको दुवै तिर माटो राखेर आवतजावत बन्द गरिएको भएपनि यात्रुहरु पनि अटेरी गरेर टुटेकै पुलबाट यात्रा गर्ने गरेका छन् । नहरको भासिएको पुल:निर्माणका लागि सिंचाइ विभागबाट टोली आएको र निरीक्षणपछि पुलको बारेमा निर्णय गरिने नारायणी सिंचाइ ब्यवस्थापन कार्यालय वीरगञ्जका इन्जिनियर सुरेश साहले जानकारी दिए ।
मानिस हरुलाइ पुल नजिकै बनाइएको डाइभर्सनबाट आवतजावत गर्न बोर्ड लगाइएको भएपनि अटेर गरेर मानिसहरु क्षतिग्रस्त पुलबाट नै आउने जाने गरेको उनले बताए । गण्डक नहरको निर्माण भएकै बेलामा नहरको बाटोमा पर्ने तिलावे नदिमा पुल निर्माण गरिएको थियो । धेरैं पुरानो पुल भएपनि मर्मत-सम्भारसमेत नहुँदा तिलावे नदीको पुल भासिएको हो । सन् १९७५-७६ गरी दुई चरणमा निर्माण सम्पन्न गरी गण्डक नहर नेपाल सरकारलाई हस्तानान्तरण गरिएको थियो ।
पर्साको जगरनाथपुर गाउपालिकाको जानकी टोलदेखि सुरु भएको गण्डक नहर बारा जिल्ला हुँदै रौतहटसम्म कुल ८१ किलोमीटरको छ । नहरमा धान र गहुँ बालीको सिंचाइका लागि भारतले ८५० क्युसेक पानी छोडनुपर्ने सम्झौता नेपाल र भारत बीच रहेको छ ।
भर्खरै
लोकप्रिय
