आइतबार १०० वर्षको उमेरमा निधन भएका अमेरिकी पूर्वराष्ट्रपति जिमी कार्टरले सशस्त्र संघर्षमा रहेको माओवादीलाई शान्ति प्रक्रियामा ल्याउनका लागि निकै महत्त्वपूर्ण भूमिका निर्वाह गरेको राजनीति वृत्तमा विश्लेषण गरिन्छ।
माओवादी सशस्त्र संघर्षमै रहेका बेला सन् २००४ देखि उनको संस्था कार्टर सेन्टरले नेपालमा गतिविधि सुरु गरेको बताइन्छ।
तत्कालीन अमेरिकाको सरकारले माओवादीलाई ‘आतंककारी’ घोषणा गरेकै बेलादेखि उनले विद्रोही नेताहरूसँग संवाद थालेको माओवादी नेताहरूले नै बताउने गरेका छन्।
विद्रोही माओवादीलाई राजनीतिको मूलधारमा प्रवेश गराउने क्रममा अन्तरीम सरकारले गरेको पहिलो र दोस्रो संविधान सभाको चुनावमा कार्टर स्वयं नेपाल आएर चुनावको पर्यवेक्षण गरेका थिए।
२०६४ र २०७० सालमा भएका पहिलो र दोस्रो संविधान सभाको चुनावका बेला उनी नेपालमै थिए। पहिलो संविधान सभाको चुनावपछि उनले नेपालको तीनपटक भ्रमण गरेका थिए।
उनले नेपालको शान्ति प्रक्रियालाई समर्थन गरेका थिए।
कार्टरले नेपालको शान्ति प्रक्रियालाई समर्थन गरे पनि अमेरिकी सरकारले माओवादीलाई आतंककारीको सूचीबाट हटाएको थिएन। सन् २०१२ मा मात्र अमेरिकाले माओवादीलाई उक्त सूचीबाट हटाएको थियो।
कार्टर हिमालप्रेमी थिए। नेपालमा रहँदा उनले धेरै हिमालहरूको दृश्यावलोकन गरेका थिए। सन् १९८५ मा पर्यटकका रूपमा पनि उनी नेपाल आएका थिए।
यो पनि:
अमेरिकाका पूर्वराष्ट्रपति जिम्मी कार्टरको १०० वर्षको उमेरमा निधन
भर्खरै
लोकप्रिय
