वीरगञ्ज- बाराको कलैया उपमहानगरपालिका- १ स्थित सुधार केन्द्रमा कुटपिट गरी हत्या गरिएका युवक प्रदीपप्रसाद मण्डलको हत्यामा संलग्न सात जनालाई प्रहरीले सार्वजनिक गरेको छ ।
मण्डललाई कुटपिट गरी हत्या गरेको आरोपमा पक्राउ पर्नेहरूमा कलैया उपमहानगरपालिका वडा नम्बर- ३ बस्ने १९ वर्षीय सरफराज मन्सुर, २९ वर्षीय तमन्ना अली, वडा नम्बर-४ बस्ने २२ वर्षीय निरज सरार्फ,बडा नम्बर- ६ बस्ने २० वर्षीय राहुल भन्ने महमद आशु मिया शेख,वडा नम्बर- १ बस्ने २४ वर्षीय अरूण सरार्फ, १९ वर्षीय सागर गुप्ता र वडा नम्बर- २ बस्ने २१ वर्षीय प्रमेश्वर साह रहेका छन् ।
पक्राउ परेकाहरु केन्द्रमा उपचारको भर्ना भएका तथा त्यहाँ कार्यरत कर्मचारीहरु हुन् । गत शुक्रबार राति नवजन्म सुधार केन्द्रमा भर्ना भएका कलैया उपमहानगरपालिका- ९ रामपुर निवासी ३७ वर्षीय मण्डलको पक्राउ परेका सातै जनाले कुटपिट गरी हत्या गरेका थिए ।
पक्राउ परेका सात जनासहित नौ जनामाथि हत्याको अभियोगमा किटानी जाहेरी परेको बाराका प्रहरी प्रवक्ता डिएसपी प्रकाश सापकोटाले जानकारी दिए ।
सुधार केन्द्रका संचालक साहेब मन्सुरसहित दुई जना अझै फरार रहेका छन् । घटनामा संलग्न रही फरार रहेका दुई जनाको खोजी भइरहेको प्रहरी प्रबक्ता सापकोटाले बताए ।
माघ १५ गते केन्द्रमा भर्ना भएका मण्डलको हत्या गरिएपछि उनका परिवार र स्थानीयले सुधार केन्द्रका सन्चालक मन्सुरलाई पनि पक्राउ गर्न माग गर्दै आइतबार कलैयामा विरोध प्रदर्शन गर्नुका साथै प्रमुख जिल्ला अधिकारीलाई ज्ञापनपत्रसमेत बुझाएका थिए ।
भर्खरै
लोकप्रिय
