झापा – झापाको कचनकवल–६, बनियानीमा पुराणको प्रसाद खाएर १८ जना बिरामी भएका छन्। पशुपति दाहालको वार्षिकीमा विष्णु दाहालको घरमा तीन दिनदेखि लगाइएको पुराणको प्रसाद खाएर ३ जना बालबालिकासहित १८ जना बिरामी भएका हुन्।
बिरामीको संख्या बढ्दै गएको छ। शनिवार बेलुका प्रसाद खाएकोमा आइतबार बिहानदेखि उनीहरूलाई ज्वरो आउने, टाउको दुख्ने, बान्ता हुनेजस्ता समस्या देखिएको छ।
बिहान साढे ११ बजे शुरुमा एकजना वृद्धा विरामी भएर आएकोमा त्यसपछि अरु पनि आउन थालेको प्राथमिक स्वास्थ्य केन्द्र, बनियानीका चिकित्सक डा. दिपेन राजवंशीले बताए।
उनले स्वास्थ्य केन्द्र विरामीले भरिसकेको जानकारी दिए। भर्ना भएकामध्ये १२ जना निको भएको र केहीलाई रेफर गर्ने तयारी भइरहेको कचनकवल गाउँपालिकाका उपाध्यक्ष नवराज भट्टराईले बताए। विषाक्त प्रसाद चेकजाँच गर्न दाहालको घरमा स्वास्थ्यकर्मी पठाइएको उपाध्यक्ष भट्टराईले जानकारी दिए।
भर्खरै
लोकप्रिय
