हुम्ला – मनसुन छिट्टै सक्रिय हुँदा आकासे पानीको भरमा धान रोप्नुपर्ने कर्णालीका अधिकांश ठाउँमा रोपाइँ भइरहेको छ। हालसम्म प्रदेश कृषि विकास निर्देशनालयका अनुसार कर्णालीमा ३९ प्रतिशत रोपाइँ सम्पन्न भएको छ।
निर्देशनालयका अनुसार पहाडी जिल्लाका धेरैजसो ठाउँमा रोपाइँ भइसकेको छ। सिँचाइ सुविधा भएका र खोला आसपासेका खेतमा रोपाइँ सकिएको छ।
मध्यअसारसम्म सबैभन्दा बढी जुम्ला, हुम्ला, डोल्पामा ९०÷९० प्रतिशत रोपाइँ भएको छ। मुगुमा ४०, रुकुम–पश्चिममा ५५ र जाजरकोटमा १७ प्रतिशत खेतमा रोपाइँ गरिएको छ।
त्यस्तै सल्यानमा ६५, दैलेखमा ३२, कालीकोटमा ४२ र सुर्खेतमा २० प्रतिशत रोपाइँ भइसकेको निर्देशनालयले जनाएको छ। कर्णालीमा धान खेती हुने ४१ हजार ५०५ हेक्टर क्षेत्रफल मध्ये २९ हजार पाँच सयभन्दा बढी हेक्टर क्षेत्रफलमा धान रोप्ने काम सकिएको हो।
यस पटक समयमै आधा रोपाइँ सकिएकाले उत्पादन पनि राम्रो हुने अपेक्षा गरिएको छ। कर्णाली प्रदेशमा खास गरी मार्सी, हाइब्रिड, शङ्कर, खुक्खा जातका धान लगाउने गरिन्छ। यी जातका धानको उत्पादनसमेत बढी हुने गरेको छ। विगतमा जस्तो रासायनिक मल अभावको समस्या नहुँदा पनि किसानले समयमै धान रोप्न पाएका हुन्।
भर्खरै
लोकप्रिय
