काठमाडौँ— चर्चित हास्य टेलिसिरियल ‘मेरी बास्सै’मा ‘अप्सरा आमा’को भूमिकाबाट दर्शकमाझ लोकप्रिय बनेकी कलाकार लक्ष्मी श्रेष्ठको निधन भएको छ। उनी शुक्रबार राति संसारबाट बिदा भएकी हुन्।
श्रेष्ठ केही महिनादेखि बिरामी थिइन्। उनको निधनको खबर कलाकार सिताराम कट्टेल ‘धुर्मुस’ले सामाजिक सञ्जालमार्फत सार्वजनिक गरेका हुन्।
‘मेरी बास्सै’मा धुर्मुसले निभाएको ‘खड्काजी’ पात्रकी छुच्ची स्वभावकी श्रीमती ‘अप्सरा आमा’को भूमिकामा श्रेष्ठले जीवन्त अभिनय गरेकी थिइन्।
उनी स्तन क्यान्सरलगायतका रोगबाट पीडित थिइन् र पछिल्ला केही सातादेखि ओछ्यानमै थलिएकी थिइन्।
लामो समयदेखि अभिनय क्षेत्रमा सक्रिय रहेकी श्रेष्ठले ‘मेरी बास्सै’ बाहेक ‘जिरे खुर्सानी’, ‘कान्छी’, ‘उल्टो सुल्टो’ जस्ता टेलिसिरियलहरूमा पनि अभिनय गरेकी थिइन्।
साथै, उनले ‘लक्का जवान’ फिल्म र थुप्रै म्युजिक भिडियोहरूमा समेत आफ्नो अभिनय प्रस्तुत गरेकी थिइन्।
श्रेष्ठको निधनले नेपाली मनोरञ्जन क्षेत्रमा अपूरणीय क्षति पुगेको छ।
भर्खरै
लोकप्रिय
