काठमाडौँ – मधेश प्रदेशका धनुषा, महोत्तरी, सर्लाही, रौतहट र बाराका करिब १ लाख २२ हजार हेक्टर जमिनमा वर्षैभरि सिँचाइ सुविधा पुर्याउने लक्ष्यका साथ २०७७ सालमा शिलान्यास गरिएको सुनकोशी मरिन बहुउद्देश्यीय डाइभर्सन आयोजनाको काम सुस्त गतिमा अघि बढिरहेको छ।
हाल नेपाल सरकारले विपद्ग्रस्त क्षेत्र र प्रदेश सरकारले सुक्खाग्रस्त क्षेत्र घोषणा गरेको मधेश प्रदेशमा सिँचाइ सुविधा पुर्याउन यो आयोजनाको भूमिका महत्त्वपूर्ण मानिएको छ।
तर, एक वर्षअघि नै आयोजनाको सुरुङ ‘ब्रेक थ्रु’ गरिए पनि पटेल–रमण (संयुक्त) निर्माण कम्पनीले बाँध निर्माणको काम प्रभावकारी रूपमा अगाडि बढाउन सकेको छैन।
१४ अर्ब सात करोड ५९ लाख रुपैयाँको लागतमा बाँध निर्माणको ठेक्का लिएको उक्त निर्माण कम्पनीले बाँध निर्माण सुरु भएको ३० महिनामा जम्मा ७ प्रतिशत मात्र काम सम्पन्न गरेको छ।
यो आयोजनाले सुनकोशी नदीको पानीलाई सुरुङमार्फत कमलामाई नगरपालिकाको कुसुमटारस्थित मरिण खोलामा खसाल्नेछ। त्यहाँबाट मरिण नदी हुँदै बागमती ब्यारेकमार्फत तराई मधेशका खेतहरूमा सिँचाइ पुर्याइनेछ।
हालसम्म आयोजनाको समग्र भौतिक प्रगति ३५ प्रतिशत पुगेको छ। आयोजनाले २०८४ असोजसम्म सम्पूर्ण निर्माण कार्य सम्पन्न गर्ने लक्ष्य राखेको जानकारी दिएको छ।
तस्बिरहरूः
भर्खरै
लोकप्रिय
