काठमाडौँ- पूर्वराष्ट्रपति विद्यादेवी भण्डारीले नेपालको रैथाने अन्नबाली कोदोको महत्त्वलाई उजागर गर्दै यसको संरक्षण र प्रवर्द्धनका लागि आह्वान गरेकी छन्।
सामाजिक सञ्जालमा लेख्दै उनले धान, मकै र गहुँपछि चौथो मुख्य बालीको रूपमा रहेको कोदोलाई नीतिगत बेवास्ता र सामाजिक उपेक्षाका कारण सङ्कटमा परेको भन्दै चिन्ता व्यक्त गरेकी हुन्।
पूर्वराष्ट्रपति भण्डारीले कोदो खेतीलाई आधुनिक र आत्मनिर्भर बनाउनुपर्नेमा जोड दिएकी छन्। उनले यसका लागि भूमिको सदुपयोग, किसानको सम्मान, उत्पादनको व्यावसायीकरण, नवप्रवर्तन र प्रविधिको प्रयोग आवश्यक रहेको बताएकी छन्। साथै, उनले रैथाने बीउको संरक्षण, बजारमा पहुँच वृद्धि र युवा सहभागितालाई पनि प्राथमिकतामा राख्नुपर्ने उल्लेख गरेकी छन्।
कोदोलाई जलवायु अनुकूल, वातावरणमैत्री र न्यूनतम जलस्रोतमा आधारित पोषणयुक्त बालीको रूपमा चित्रण गर्दै पूर्वराष्ट्रपति भण्डारीले यसको संरक्षण र प्रवर्द्धनको अभियानलाई राष्ट्र निर्माणको अभिन्न हिस्सा बनाउन सबैलाई मिलेर काम गर्न आग्रह गरेकी छन्।
भर्खरै
लोकप्रिय
