धनगढी- कैलाली कारागारमा शुक्रबार राति भएको झडपको छानबिनका लागि जिल्ला सुरक्षा समितिले पाँच सदस्यीय समिति गठन गरेको छ।
प्रमुख जिल्ला अधिकारी (सीडीओ) गोगनबहादुर हमालको अध्यक्षतामा शनिबार बसेको जिल्ला सुरक्षा समितिको बैठकले सहायक प्रमुख जिल्ला अधिकारी किरण जोशीको संयोजकत्वमा छानबिन समिति गठन गर्ने निर्णय गरेको हो।
समितिमा जिल्ला प्रहरी कार्यालय कैलालीका प्रहरी नायव निरीक्षक राजकुमार सिंह, सशस्त्र प्रहरीका डीएसपी जनकराज पन्त, राष्ट्रिय अनुसन्धान विभागका अनुसन्धान अधिकृत दिपेन्द्र सिंह र जिल्ला प्रशासन कार्यालय कैलालीका प्रशासकीय अधिकृत शिवराज जोशी सदस्य रहेका छन्।
समितिलाई घटनाको विस्तृत छानबिन गरी १० दिनभित्र प्रतिवेदन बुझाउन समयसीमा तोकिएको प्रमुख जिल्ला अधिकारी हमालले जानकारी दिएका छन्।
गत शुक्रबार राति कैलाली कारागारमा कैदीबन्दीका दुई समूहबीच भएको झडपमा एक जनाको मृत्यु भएको थियो भने ४७ जना घाइते भएका थिए। यही घटनाको सत्यतथ्य पत्ता लगाउन र दोषीलाई कारबाहीको सिफारिस गर्न यो समिति गठन गरिएको हो।
भर्खरै
लोकप्रिय
