नेपालको अटोमोबाइल क्षेत्रको सबैभन्दा ठूलो र प्रतिष्ठित प्रदर्शनीको रूपमा रहेको नाडा अटो शो २०२५ आगामी भदौ ३ देखि ८ गतेसम्म काठमाडौँको भृकुटीमण्डपमा आयोजना हुँदैछ। आर्थिक मन्दी र बजारका चुनौतीहरूका बाबजुद पनि यस वर्षको शोलाई अझै विशेष र प्रभावकारी बनाउने प्रयास गरिएको आयोजकले जनाएको छ।
‘दिगो, स्मार्ट र भविष्यमुखी’ भन्ने मूल नाराका साथ आयोजना हुन लागेको यो प्रदर्शनीले नयाँ प्रविधिहरूको प्रदर्शन मात्र नभई, ग्राहकका लागि विशेष योजनाहरू र अटोमोबाइल उद्योगको भविष्यलाई दिशा दिने लक्ष्य लिएको छ।
नाडा अटो शो २०२५ को मुख्य उद्देश्य केवल सवारीसाधनको बिक्री-वितरण गर्नु मात्र नभई, नेपाली उपभोक्तालाई विश्व बजारमा भित्रिएका नयाँ प्रविधि, विद्युतीय सवारीसाधन (इभी) र स्मार्ट मोबिलिटी सोलुसनहरूसँग जोड्नु पनि हो। यसले अटोमोबाइल उद्योगमा सकारात्मक गतिशीलता ल्याउने र उद्योगको पुनर्जीवनका लागि महत्त्वपूर्ण भूमिका खेल्ने विश्वास गरिएको छ।
यस शोलाई प्रविधि र व्यापारिक दुवै दृष्टिकोणबाट सफल बनाउने प्रयास भइरहेको आयोजकले जनाएको छ। यसै सन्दर्भमा, देशसञ्चारकर्मी कपिल भण्डारीले नाडा अटो शो र यसको प्रभावकारिता, आधुनिक प्रविधि, ग्राहकहरूको रुचि र आकर्षण तथा नवप्रवर्तनका बारेमा अध्यक्ष करण चौधरीसँग गरेको कुराकानीको सार यहाँ प्रस्तुत छ।
१. नाडा अटो शो २०२५ को तयारी र अहिलेको अवस्था कस्तो छ?
नाडा अटो शो २०२५ को तयारी अहिले अन्तिम चरणमा पुगेको छ। स्टलको बाँडफाँटदेखि ब्रान्डहरूको सहभागिता, प्राविधिक तयारी, पविलियनको डिजाइन, र सम्पूर्ण कार्यक्रम तालिकाको काम तीव्र गतिमा अघि बढेको छ। यस वर्ष हामीले केवल सवारीसाधनको प्रदर्शनीलाई मात्र नभई, ग्राहकका लागि अनुभव, शिक्षा र भविष्यको दृष्टिकोणलाई समेट्ने गरी एक विशेष अवधारणा तयार पारेका छौं। यसबाट शोमा आउने सबै आगन्तुकले नयाँ प्रविधि र भविष्यको मोबिलिटीबारे जानकारी प्राप्त गर्ने हाम्रो विश्वास छ।
२. आर्थिक मन्दीमा ग्राहकलाई कसरी आकर्षित गर्न सकिन्छ?
अहिलेको आर्थिक मन्दीको अवस्थामा ग्राहकलाई आकर्षित गर्नका लागि जतिसक्दो कम र पारदर्शी मूल्य नीति, सुविधाजनक फाइनान्स स्किम, उत्कृष्ट बिक्रीपश्चात् सेवा, र दीर्घकालीन मूल्य संरक्षण जस्ता कुराहरूमा विशेष जोड दिनुपर्छ। यसका साथै, अनुभवमा आधारित मार्केटिङ, टेस्ट ड्राइभको व्यवस्था, र एक्सचेन्ज अफर जस्ता योजनाहरूले पनि ग्राहकको चासो बढाउन सक्छन्। अहिलेको समयमा मूल्यमा मात्र प्रतिस्पर्धा नगरी ग्राहकसँग विश्वासको सम्बन्ध स्थापित गर्नु सबैभन्दा महत्त्वपूर्ण हुन्छ।
३. ‘दिगो, स्मार्ट र भविष्यमुखी‘ नारालाई व्यवहारिक कसरी बनाइँदैछ?
यस वर्षको नारा ‘दिगो, स्मार्ट र भविष्यमुखी’ लाई व्यवहारिक बनाउन हामीले तीन मुख्य आधारमा काम गरिरहेका छौं:
- दिगोपनाका लागि: विद्युतीय सवारी (इभी), हाइब्रिड र अन्य स्वच्छ प्रविधिमा आधारित सवारीसाधनलाई प्राथमिकता दिइँदैछ।
- स्मार्टनेसका लागि: स्मार्ट कनेक्टेड कार प्रविधि, डिजिटल इन्टिग्रेशन र स्मार्ट चार्जिङ सोलुसनहरू प्रस्तुत गरिनेछ।
- भविष्यमुखीपनाका लागि: स्वचालित प्रविधि, रोबोटिक्स र नयाँ मोबिलिटी मोडलहरूबारे जानकारी दिइनेछ।
यी तीनै पक्षलाई सन्तुलित रूपमा प्रस्तुत गरेर नेपाललाई आगामी दशकको मोबिलिटी ट्रेन्डसँग जोड्ने हाम्रो लक्ष्य रहेको छ।
४. अहिलेका चुनौतीहरू र आशावादको आधार के-के हुन्?
अहिलेका चुनौतीहरूमा आर्थिक मन्दी, नीतिगत अस्थिरता, र उपभोक्ताको सावधानीपूर्ण खर्च गर्ने बानी स्पष्ट छन्। तर, हामी यी चुनौतीबीच आशावादी पनि छौं। यसका केही बलिया कारणहरू पनि छन्, जस्तो: सम्पूर्ण उद्योगको एकता, प्रविधिमा भइरहेको तीव्र प्रगति, र उपभोक्तामा नयाँ प्रविधि अपनाउने उत्साह। यी सबै पक्ष र नाडा अटो शोको बलियो ब्रान्ड मूल्य नै हाम्रो सबैभन्दा ठूलो शक्ति हो।
५. सबै अटो व्यवसायीलाई समेट्न सम्भव छ?
हामी सधैँ सम्पूर्ण व्यवसायीलाई समेट्ने प्रयास गर्छौं। तर, बजारको प्रकृति, उपलब्ध स्थान र तयारीको समयसीमाका कारण सबै व्यवसायीलाई समेट्न भने सम्भव हुँदैन। तैपनि, नाडा अटो शोमा भाग लिन चाहने जो कोहीलाई समान अवसर दिने हाम्रो नीतिले उद्योगका लागि एक साझा र समावेशी प्लेटफर्म सुनिश्चित गरेको छ।
६. ग्राहकको पहुँचमा हुने योजना र प्रविधिको प्रदर्शनमध्ये कुन महत्त्वपूर्ण छ?
प्रविधि र आकर्षक सवारीसाधनले शोमा भीड ल्याउँछ, तर बिक्री र कारोबारका योजनाहरूले बजारमा प्रत्यक्ष प्रभाव पार्छन्। त्यसैले, हामीले यसपटक दुवै पक्षलाई समान रूपमा प्राथमिकतामा राखेका छौं। यस शोमा नविनतम प्रविधि, रोबोटिक्स, र ऐतिहासिक सवारी प्रदर्शन जस्ता आकर्षणका साथै विशेष अफर, एक्सचेन्ज स्किम र फाइनान्स योजनाहरू पनि समावेश गरेका छौं। यसले गर्दा शो केवल हेर्ने ठाउँ मात्र नभई, खरिद गर्ने अवसर पनि बन्नेछ।
७. यसपटकको मुख्य लक्ष्य के हो?
यस वर्षको नाडा अटो शो २०२५ को मुख्य फोकस तीन पक्षमा केन्द्रित छ:
- नयाँ प्रविधि र नवप्रवर्तनको प्रदर्शन: पछिल्लो समयका विश्वस्तरीय प्रविधिहरूलाई नेपाली बजारमा चिनाउने।
- ग्राहक-व्यवसायी प्रत्यक्ष सम्पर्क: ग्राहक र व्यवसायीबीचको सम्बन्धलाई थप मजबुत बनाउने।
- बजारमा सकारात्मक गतिशीलता ल्याउने व्यापारिक परिणाम: अटो सेक्टरमा नयाँ उत्साह र सकारात्मक कारोबारको वातावरण सिर्जना गर्ने।
हामी यस शोलाई नेपालको अटोमोबाइल उद्योगको पुनर्जीवनको प्रतीक बनाउन चाहन्छौं।
भर्खरै
लोकप्रिय
