अस्ट्रेलिया भ्रमणमा रहेको नेपाली राष्ट्रिय टोलीले आजबाट सुरु भएको टप इन्ड टी–२० सिरिजको पहिलो खेलमा हार भोगेको छ। घरेलु टोली नर्दर्न टेरिटोरी स्ट्राइकरसँग नेपाल ४२ रनले पराजित भएको हो। १७८ रनको लक्ष्य पछ्याएको नेपाल निर्धारित २० ओभरमा ८ विकेट गुमाएर १ सय ३५ रन मात्र बनाउन सफल भयो।
नेपालका लागि कुशल मल्लले सर्वाधिक ३४ रन बनाउँदा गुल्शन झाले १० बलमा दुई चौका र दुई छक्काको सहयोगमा २६ रन बनाए। त्यस्तै कप्तान रोहितकुमार पौडेल २३, दीपेन्द्रसिंह ऐरी १९ र आशिफ शेख ११ रनमा आउट भएका थिए।
नर्दर्न टेरिटोरीका म्याट ह्यामन्डले सर्वाधिक तीन विकेट लिंदा केन रिचर्डसनले २ विकेट लिएका थिए। त्यस्तै थोमस एन्ड्रयुज र हामिश मार्टिनको नाममा समान एक–एक विकेट रह्यो।
त्यसअघि टस हारेर पहिले ब्याटिङ गरेको नर्दन टेरिटोरीले निर्धारित २०ओभरमा आठ विकेट गुमाएर १ सय ७७ रन बनाएको थियो।
उसका लागि डार्सी शर्टले ३४ बलमा सात चौका र एक छक्काको मद्दतले सर्वाधिक ५१ रनको अर्धशतकीय इनिङ खेल्दा थोम एन्ड्रयुले अविजित ३३, जोर्डन सिल्कले १९, कोनर क्यारोलले १८, क्याडी म्याकमोनले १२ र कप्तान जेक वेदराल्डले ११ रन बनाएका थिए
नेपालका लागि सन्दीप लामिछानेले ३ विकेट लिंदा शाहब आलमले २ तथा दीपेन्द्रसिंह ऐरी, रुपेश सिंह र कप्तान रोहितकुमार पौडेलले समान १–१ विकेट लिए।
भर्खरै
लोकप्रिय
