दाङ- राष्ट्रिय स्वतन्त्र पार्टी (रास्वपा)का नेता हरिप्रसाद कँडेल नक्कली शैक्षिक प्रमाणपत्र बनाउन संलग्न भएको आरोपमा प्रहरीले पक्राउ गरेको छ ।
चितवनको कालिका नगरपालिका- ५ पदमपुरका कँडेललाई भदौ ४ गते रुपन्देही प्रहरीले नियन्त्रणमा लिएको हो । उनी रास्वपाको बागमती प्रदेश प्रशिक्षण विभागका संयोजक हुन् ।
रुपन्देही प्रहरी प्रमुख एसपी प्रदीप क्षेत्रीका अनुसार कँडेललाई चितवनबाट पक्राउ गरी रुपन्देही ल्याइएको छ । उनलाई नक्कली प्रमाणपत्र बनाउने कसुरमा अनुसन्धान थालिएको प्रहरीले जनाएको छ ।
यसअघि साउन ३० गते बेलहिया बसपार्कस्थित होटल मुक्तिनाथ परिसरबाट भारतको कानपुर नौबस्तीका २५ वर्षीय अभिषेक यादव पक्राउ परेका थिए ।
यादवसँग विभिन्न नेपाली तथा भारतीय विश्वविद्यालयका नक्कली प्रमाणपत्र र ती बनाउन प्रयोग हुने सामग्री बरामद भएको थियो । यादवको बयानका आधारमा कँडेल पक्राउ परेका हुन्।
भर्खरै
लोकप्रिय
