मोरङ – विराटनगरमा जारी १४ वर्षमुनिको बिकेभिएम कप फुटबलको उपाधिका लागि मोर्डन एरा बोर्डिङ स्कुल र बिकेभिएमबीच प्रतिस्पर्धा हुने भएको छ।
शुक्रबार बिकेभिएमको घरेलु मैदान सम्पन्न पहिलो सेमिफाइनलमा बिकेभिएमले विराट शिक्षा निकेतनलाई १–० शून्यले स्तब्ध बनाउँदै उपाधि नजिक पुगेको हो।
निर्धारित ५० मिनेटको खेलको पहिलो हाफमा दुवै विद्यालय गोलरहित बराबरीमा रोकिएका थिए। जित हात पारेको बिकेभिएमका लागि निर्णायक गोल भने दोस्रो हाफमा भएको थियो।
प्रतिस्पर्धात्मक बनेको खेलको ३८ औँ मिनेटमा बिकेभिएमका लागि स्पर्श मगरले आकर्षक गोल गर्दै टोलीलाई फाइनलमा पुर्याएका थिए। उनी प्लेयर अफ दि म्याच भए।
त्यसैगरी दोस्रो सेमिफाइनलमा मोर्डन एरा सेकेण्डरी स्कुलले अर्पण सेकेण्डरी स्कुललाई १–० ले पाखा लगाउँदै फाइनलको टिकट काटेको छ।
खेलको पहिलो हाफमा दुवै टोली गोलरहित बराबरीमा रोकिएका थिए। मोर्डन एराको जितमा रोसिक राईले खेलको ४२ औँ मिनेटमा गोल गरेका थिए। राई प्लेयर अफ दि म्याच भए।
प्रतियोगितामा प्राविधिक सहयोग गरिरहेको जिल्ला फुटबल संघ, मोरङका सहकोषाध्यक्ष अमित झाका अनुसार उपाधिका लागि मोर्डन एराले शनिबार अपराह्न ४ बजे हुने फाइनलमा बिकेभिएमको सामना गर्नेछ।
बिकेभिएमले यसअघि ग्रीनल्याण्ड स्कुललाई १०–० ले पराजित गरेको थियो। त्यसैगरी मोर्डन एराले एभरेष्ट सेकेण्डरी स्कुल र ग्रेडेड सेकेण्डरी स्कुललाई पराजित गरेको थियो।
भर्खरै
लोकप्रिय
