गोरखा- धार्चे गाउँपालिका–५ गुम्दामा विगत वर्षमा झैँ यस वर्ष पनि आलु मेला सम्पन्न भएको छ । गुम्दा एकता युवा क्लब र थामरा धार्चे युवा क्लबले यही भदौ १ देखि ५ गतेसम्म उक्त मेला आयोजना गरेको हो ।
‘अग्रज स्रष्टा र खेलाडीको सम्मान, कला, संस्कृति, पर्यटनको प्रवर्द्धनमा हाम्रो अभियान’ नाराका साथ मेला आयोजना गरिएको आयोजक गुम्दा एकता क्लबका अध्यक्ष मनुराज गुरुङले बताए। मेलामा जिल्लास्तरीय अन्तर क्लब पुरुष र महिला भलिबल प्रतियोगिता तथा स्थानीयस्तरमा उत्पादन भएका आलु प्रदर्शनसँगै विविध सांस्कृतिक कार्यक्रम आयोजना गरिएको थियो ।
पुरुष भलिबल प्रतियोगितामा धार्चे–७ लापुबेँसीको घले हाब्रेस्टिङ युवा क्लब प्रथम, बारपाक सुलिकोटको बाह्रमुले युवा क्लब द्वितीय र बारपाक सुलिकोट युवा क्लब प्रतियोगितामा तृतीय भयो । प्रथम, द्वितीय र तृतीय हुने टोलीले क्रमशः रु ७५ हजार, रु ५० हजार र रु ३० हजार नगदसहित ट्रफी, मेडल र प्रमाणपत्र प्राप्त गरे ।
महिला भलिबलतर्फ बारपाक सुलिकोटक टोली ‘ए’ प्रथम, बारपाक सुलिकोटक टोली ‘बी’ द्वितीय र द मुस्कान युवा क्लब तृतीय भए । उनीहरूले क्रमश रु २० हजार, रु १० हजार र रु सात हजारसहित ट्रफी, मेडल र प्रमाणपत्र प्राप्त गरेको अध्यक्ष गुरुङले बताए। प्रतियोगितामा पुरुष र महिला भलिबलतर्फ प्रथम, दोस्रो र तेस्रो हुने सबै टोलीलाई तीन–तीन पाथी आलु प्रदान गरिएको थियो ।
यस्तै, एकल लोक नृत्य प्रतियोगितामा रुपा गुरुङ प्रथम, सुस्मिता सुनार द्वितीय र निस्मा गुरुङ तृतीय भइन् । समूहगत लोकनृत्य प्रतियोगितामा धार्चे आमा समूह गुम्दा प्रथम, गुम्दा एकता महिला समूह गुम्दा द्वितीय र हिमाली आमा समूह लाप्राक तृतीय भए । धार्चेको गुम्दा, लाप्राकलगायत आसपासका गाउँलाई आलु पकेट क्षेत्रका रूपमा चिन्ने गरिन्छ । यहाँको मुख्य खाद्यान्न बाली नै आलु हो । यहाँ उत्पादित आलु जिल्लाका सदरमुकाम तथा विभिन्न स्थानीय तहसँगै पोखरा, काठमाडौँलगायतका बजारमा बिक्री गरिन्छ ।
भर्खरै
लोकप्रिय
