झापा- झापाको कचनकवल गाउँपालिका–१ सोमबारे बजारकी ३३ वर्षीया गोमा भण्डारीले श्रीमानको दुर्घटना भएपछि दुग्ध संकलन केन्द्रको सम्पूर्ण जिम्मेवारी सम्हालेर उदाहरणीय साहस प्रदर्शन गरेकी छिन् ।
छ महिनाअघि श्रीमान जीवन भण्डारी सडक दुर्घटनामा परी खुट्टा भाँचिएपछि बन्द हुने अवस्थामा पुगेको व्यवसायलाई गोमाले आफैँ टेम्पु चलाएर बचाइन् । “श्रीमान दुर्घटनामा परेपछि सुरुमा कर्मचारी राखेर काम चलायौं, तर पछि आफैँ टेम्पु चलाएर दूध संकलन गर्न थालेँ,” उनी भन्छिन् ।
बिहान ५ बजेदेखि १२ बजेसम्म र बेलुका ४ बजेदेखि ७ बजेसम्म गोमाले डाँगीबारी, कुईमारी, आमबाडी, प्रगति टोल, बरालडाँडा, दुर्गाभिट्टा र खेरीबारीका बस्तीबाट दूध संकलन गर्छिन् । दूध संकलनदेखि लिएर केन्द्रमा ल्याउने, मापन गर्ने, प्रशोधन गर्ने, ग्राहकलाई वितरण गर्ने र हिसाब राख्ने सबै जिम्मेवारी उनी एक्लैले सम्हालेकी छिन् ।
“सुरुमा महिलाले यो काम गर्न सक्छिन् जस्तो लागेको थिएन,” उनले भनिन्, “तर परिवार सम्झँदा हिम्मत आयो र निरन्तरता दिन सकेँ ।”
हाल गोमाले दैनिक करिब ५०० लिटर दूध संकलन गर्दै आएकी छिन् । श्रीमान् अस्वस्थ भएकाले घरमै आराम गरिरहेका छन् भने ७१ वर्षीय ससुरा र ७० वर्षीया सासुले घर र नातिनातिनीको हेरचाह गर्छन् ।
कचनकवलकै पहिलो महिला टेम्पो चालक बनेकी गोमाको यो साहस, परिश्रम र आत्मविश्वासले स्थानीय महिलाहरूलाई पनि प्रेरणा दिएको छ ।
भर्खरै
लोकप्रिय
