इंग्लिस प्रिमियर लिगमा उपाधि दाबेदार म्यानचेस्टर सिटीको जारी सिजन सुरुवातबाटै खराब लयले निरन्तरता पाएको छ। आइतबार राति सम्पन्न खेलमा सिटी सुरुवाती अग्रता जोगाउन नसक्दा ब्राइटनसँग २–१ ले स्तब्ध बन्यो। सिटीको यो लगातार दोस्रो हार हो।
ब्राइटनको जितमा ब्राजन गुरडाले अन्तिम समयमा गोल गर्दै टोलीलाइ सिजनको पहिलो प्रिमियर लिग जित दिलाएका छन्। उनले ८९औं मिनेटमा गरेको गोल निर्णायक बन्यो।
जर्मन आक्रामक मिडफिल्डर गुरडाले जेम्स ट्राफोर्डलाई छक्याएर गोल गरेका हुन्। यसअघि ट्राफोर्डले जान पोल भान हेकेको बलियो प्रहारलाई शानदार रूपमा रोक्दै खेलमा सिटीलाई बचाएका थिए।
खेलको पहिलो हाफमा भने अर्लिङ हालान्डले गोल गर्दै पेप गार्डियोलाको टोलीलाई अग्रता दिलाएका थिए। हालान्डले आफ्नो १००औं प्रिमियर लिग खेलमा ८८औं गोल गरेका हुन्।
तर दोस्रो हाफको ६७ औं मिनेटमा म्याथ्युज नुनेसले पेनाल्टी बक्सभित्र ह्यान्ड गरेपछि जेम्स मिल्नरले २०१९ पछि पहिलो पटक प्रिमियर लिगमा गोल गरे। ३९ वर्ष २३९ दिनको उमेरमा उनले गोल गर्दै दोस्रो सबैभन्दा पाको गोल स्कोरर बने।
अन्त्यतिर गुरडाको विजयी गोलपछि सिटी स्तब्ध रह्यो। स्पर्ससँग अघिल्लो हप्ता पनि पराजित सिटीले खेलको सुरुवाती एक घण्टा हावी भए पनि अवसरलाई सदुपयोग गर्न सकेन।
भर्खरै
लोकप्रिय
