मोरङ – कोशी प्रदेश लगानीका लागि आकर्षक गन्तव्य बन्न सक्ने नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउतले बताएका छन्।
विराटनगरमा सोमबार आयोजित वातावरणीय, सामाजिक र सुशासनसम्बन्धी सर्वेक्षण कार्यक्रमलाई सम्बोधन गर्दै अध्यक्ष राउतले प्रदेशले लगानीका लागि प्रचुर सम्भावना बोकेको उल्लेख गरे।
कार्यक्रममा अध्यक्ष राउतले लगानीकर्ताहरुले कम्पनी वा उद्योगको मूल्य नाफा र घाटामा मात्र नभएर सामाजिक उत्तरदायित्व, वातावरणीय प्रभाव र सुशासन अभ्यासको आधारमा पनि गर्ने गरेको बताए।
उनले भने, ‘आजको विश्व व्यावसायिक जगतमा महत्वपूर्ण अवधारणा बनिसकेको अहिलेको अवस्थामा लगानीकर्ताहरुले अब कम्पनी वा उद्योगको मूल्य केवल नाफा र घाटामा मात्र हेरिरहेका छैनन्। अब उद्योगीहरुले सामाजिक उत्तरदायित्व, वातावरणीय प्रभाव र सुशासन अभ्यासको आधारमा पनि काम गर्ने गरेका छन्। वातावरण, पर्यावरण र सामाजिक सुशासनको अवधारणाले प्रदेशलाई अन्तर्राष्ट्रिय बजारमा समेत प्रतिस्पर्धी बनाउन मद्दत गर्नेछ। यसलाई अपनाएर अघि बढ्नसकेको खण्डमा प्रदेश लगानीका लागि आकर्षक गन्तव्य बन्न सक्छ।’
कार्यक्रम नेपाल उद्योग वाणिज्य महासंघ, आईफसी र युरोपियन युनियनको आयोजना तथा नेपाल उद्योग वाणिज्य महासंघ कोशी प्रदेशको सहकार्यमा भएको हो।
त्यसैगरी कार्यक्रममा प्रदेशका जिल्लानगर उद्योग वाणिज्य संघका प्रतिनिधि, उद्योग प्रतिष्ठानका सञ्चालक गरी करीब ५० जनाको सहभागिता थियो।
भर्खरै
लोकप्रिय
