हुम्ला – लगातारको वर्षाका कारण कर्णाली नदीमा पानीको बहाब बढेपछि छेउछाउका बस्ती जोखिममा परेका छन्।
हुम्लाको सर्केगार्ड बजारका नदी किनारका बस्ती जोखिममा देखिएको स्थानीय देवकी मल्लले बताइन्। आफ्नो घरको सात मिटर परसम्म पानीको बहाब बढेर आएकोले जोखिम बढेको उनले बताइन्।
नदी किनारमा तटबन्धन निर्माण गरिएको भए पनि पानीको सतह उक्त तटबन्धनसम्मै पुगेको छ। जसका कारण १० वटा घर जोखिममा रहेको उनले बताइन्।
त्यस्तै, सलीसल्लाका व्यापारी प्रकाश शाहीले यस वर्ष नदीको बहाव धेरै बढेकोले सलीसल्लाको बजार क्षेत्र पनि जोखिममा रहेको बताए। उक्त स्थानमा १० वटा पसल छन्।
खार्पुनाथ गाउँपालिका– ४ को नल्लतर्फको खार्पु बजार पनि जोखिममा रहेको स्थानीय रत्नबहादुर शाहीले बताए।
सर्केगार्ड–४ कै न्यासीका दुई वटा साना होटेल पनि नदीको बहावले जोखिममा छन्। नदीमा पानीको बहाव दैनिक वृद्धि भइरहेकोले उच्च सतर्कता अपनाउन स्थानीय प्रशासन आग्रह गरेको छ।
भर्खरै
लोकप्रिय
