हुम्ला – चिनियाँ पक्षले दुई देशको सिमाना हिल्सामा नेपालतर्फको सडकमा ‘रिजिट पेभमेन्ट’ गरेको छ। यसअघि गत मंसिरमा दुई देश जोड्ने मितेरी पुल चिनियाँ पक्षले निर्माण गरिसकेको र अब सम्झौताअनुसार नेपालतर्फको सडकमा रिजिट पेभमेन्ट गरिएको हो।
हिल्सामा नेपालतर्फको सडकलाई रिजिट पेभमेन्ट सम्पन्न गरेको अनुगमन तथा समन्वय गर्ने जिम्मा पाएको हिल्सा–सिमकोट सडक योजनाले जनाएको हो।
चिनियाँ पक्षले हिल्साको कर्णाली नदीमाथि दुई देश जोड्ने पक्की पुल यसअघि नै निर्माण गरिसकेको थियो। दुई देशबीच भएको सम्झौताअनुसार पक्की पुल निर्माण गरिसकेपछि चिनियाँँ पक्षले नेपालतर्फको पुलको अन्तिम बिन्दुबाट साढे तीन सय मिटर सडक निर्माण गरेर उक्त काम गर्नुपर्ने उल्लेख भएअनुसार सो सडकको पेभमेन्ट गरिएको होे।
आठ मिटर चौडा सडक पेभमेन्ट गरिएको छ। पेभमेन्ट मापदण्डअनुसार सुरु गरी सम्पन्न भएको हो। पेभमेन्टका लागि आवश्यक उपकरण र निर्माण सामग्रीसमेत सबै निर्माण स्थलमा चिनियाँ पक्षले ल्याएको थियो। सो सडक पेभमेन्ट यसअघि नै हुनुपर्ने भए पनि संरचनामा क्षति पुग्ने भएपछि पहिलेको लोकेशन परिवर्तन गर्नेतर्फ पहल गरिएको र कुरा नमिल्दा सम्झौतामा उल्लेख भएकै स्थानबाट सडक पेभमेन्ट गर्ने गरी काम अगाडि बढेको हो।
हिउँदमा चिसोको कारण पेभमेन्ट गर्न कठिन हुने र समस्या आउने भएपछि काम अगाडि नबढेको होे। सडकको पेभमेन्ट गर्ने कार्य नभएकै कारण हिल्सामा निर्माण गरिएको पक्की पुलसमेत सञ्चालनमा आउन सकेको छैन। सडक पेभमेन्ट भएपछि अब पुलसमेत सुचारु हुनेछ।
यसअघि जिल्लाका आधा दर्जन छोटा सडकमा ढलान गरिए पनि पेभमेन्ट सडक गरिएको यो पहिलो भएको चिनियाँ प्राविधिक टोलीले बताएको छ। हिल्साबाट सिमकोटसम्मको ९५ किलोमिटर सडक पनि चिनियाँ पक्षले तीन वर्षमा स्तरोन्नति र कालोपत्रे गर्ने सम्झौता भएअनुसार चिनियाँ प्राविधिक टोली हिल्सा हुँदै सिमकोटसम्म सडकको विस्तृत सर्भे गरेर फर्किसकेको छ।
भर्खरै
लोकप्रिय
