ब्राजिलियन फुटबल स्टार नेयमारको नाममा एक अनौठो र अविश्वसनिय घटना अहिले विश्वभर चर्चा भइरहेको छ। एक ब्राजिलका अर्बपति प्रशंसकले आफ्ना प्रिय फुटबल स्टार नेयमार जुनियरको नाममा आफ्नो सम्पूर्ण सम्पत्ति हस्तान्तरण गर्ने इच्छापत्र तयार पारेर अदालतमा बुझाएका छन्।
सन् २०२५ को जुन महिनामा पोर्टो एलेजरेमा दर्ता गरिएको इच्छापत्रमा एक ३१ वर्षीय व्यवसायीले आफ्नो करिब २० करोड डलर (जुन केही रिपोर्टहरूमा ७५२ मिलियन पाउन्डसम्म हुनसक्ने अनुमान गरिएको छ) को विशाल सम्पत्ति नेयमारलाई सुम्पिने कानूनी प्रक्रिया अगाडि बढाएका थिए। उनको पत्रमा दुई साक्षी र एक उप-नोटरीको उपस्थितिमा हस्ताक्षर गरिएको थियो, जसले कानुनी आवश्यकताहरू पूरा गरेको छ।
अझ रोचक पक्ष त के छ भने, उनले नेयमारलाई व्यक्तिगत रूपमा कहिल्यै भेटेका थिएनन्। यदि यो इच्छापत्र ब्राजिलको कानून अनुसार पूर्ण रूपमा स्वीकृत भयो भने, यसले नेयमारको हालको कुल सम्पत्तिलाई दोब्बरभन्दा बढी बनाइदिने छ।
स्थानीय सञ्चारमाध्यमका अनुसार, ती व्यवसायी अविवाहित थिए र उनको कुनै सन्तान छैन। आफ्नो स्वास्थ्य अवस्था कमजोर रहेको र जीवनको कुनै निश्चितता नभएकाले उनले आफ्नो सम्पत्ति सरकार वा आफूसँग सुमधुर सम्बन्ध नभएका नातेदारलाई दिनुको सट्टा आफ्नो आदर्श पात्रलाई दिने निर्णय लिएका हुन्। स्पेनको समाचार संस्था डियारिइ एएससँगको कुराकानीमा उनले यस निर्णय पछाडिका गहिरो भावनात्मक कारणहरू खोलेका छन्। उनले नेयमार र उनका बुबाबीचको आत्मीय सम्बन्धमा आफ्नो र आफ्ना स्वर्गीय बुबाको झल्को देखेको बताएका थिए।
यसका साथै, आफू पनि नेयमारजस्तै समाजमा हुने अनावश्यक आलोचना र मानहानिको शिकार भएको महसुस गर्ने भएकाले उनी नेयमारसँग एक प्रकारको समभाव राख्ने गर्थे। बाहिरी दुनियाँमा नेयमारको छवि जस्तोसुकै भए पनि, ती व्यवसायी नेयमारलाई ‘पैसाको पछि नलाग्ने’ र पारिवारिक मूल्यमान्यतालाई सम्मान गर्ने व्यक्तिको रूपमा हेर्थे।
यद्यपि, उनको यो इच्छा पूरा हुनका लागि लामो र जटिल कानूनी प्रक्रिया पार गर्नुपर्ने देखिन्छ। ब्राजिलको कानून अनुसार, कुनै पनि इच्छापत्रलाई अदालतले प्रमाणीकरण गर्नुपर्छ, जसमा महिनौं वा वर्षौंसमेत लाग्न सक्छ। साथै, ब्राजिलको कानूनले उत्तराधिकारको निश्चित हिस्सा परिवारका सदस्यहरूका लागि सुरक्षित गरेकाले ती व्यवसायीका आफन्तहरूले इच्छापत्रलाई चुनौती दिन सक्ने सम्भावना प्रवल छ। यति ठूलो रकमको सम्पत्ति हस्तान्तरणमा लाग्ने करको दायित्व पनि अर्को महत्वपूर्ण पाटो हो।
यस अनौठो घटनाक्रमबारे हालसम्म नेयमार वा उनको व्यवस्थापन टोलीले कुनै आधिकारिक प्रतिक्रिया दिएको छैन। विश्वकै सर्वाधिक धनी खेलाडीहरूमध्ये एक नेयमारले यो सम्पत्ति स्वीकार्नका लागि कानूनी लडाइँ लड्छन् वा लड्दैनन् भन्ने कुरा भविष्यले नै बताउनेछ। हाललाई भने, एक प्रशंसकको आफ्नो आदर्शप्रतिको यो अगाध प्रेम र विश्वासको कथा कानूनी अनिश्चितताबीच अड्किएको छ भने सबैको नजर यो घटनामा केन्द्रित छ।
भर्खरै
लोकप्रिय
