ट्रम्पका निकट सहयोगी चार्ली कर्कको गोली हानी हत्या

अमेरिकी राष्ट्रपति डोनाल्ड ट्रम्पका निकट सहयोगी चार्ली कर्कको गोली हानी हत्या गरिएको छ। बिहीबार एउटा कार्यक्रमका दौरान उनको गोली हानी हत्या गरिएको हो।

यो घटना अमेरिकाको युटा राज्यस्थित ‘युटा भ्याली युनिभर्सिटी’मा भएको हो। चार्ली त्यहाँ ‘दि अमेरिकन कमब्याक टुर’ कार्यक्रममा सहभागी हुन आएका थिए। उनी कन्जरभेटिभ इन्फ्लुएन्सरका रूपमा रहेका थिए।

सोसल मिडियामा भाइरल भएको भिडियोमा चार्ली एउटा टेन्टभित्र माइक समाएर बोलिरहेका थिए। त्यही बेला अचानक गोली उनको घाँटी नजिकै लाग्छ, धेरै रगत बग्छ र उनी भुइँमा ढल्छन्। चार्लीको हत्या प्रकरणमा ट्रम्पले आफ्नो निजी सोसल मिडिया ‘ट्रुथ’ मा लेखेका छन्।

चार्लीले ‘टर्निङ पोइन्ट यूएसए’ नामक संस्था सञ्चालन गर्थे। यस संस्थामार्फत उनी विद्यालय–कलेजमा पुगेर विद्यार्थीलाई राजनीति बुझाउँथे। उनी ट्रम्पका कट्टर समर्थक र सहयोगीका रूपमा रहेका थिए। तर, हमला कसले र किन गर्यो भन्ने कुरा अझै खुलेको छैन।

डोनाल्ड ट्रम्पले आफ्नो सोसल मिडिया ‘ट्रुथ’ मार्फत भने, “महान् र साँच्चै एक अद्वितीय व्यक्तित्व, चार्ली कर्क अब हामीमध्ये छैनन्। अमेरिकाका युवाहरूलाई उनको जस्तो गहिरो समझ कसैले दिन सकेन। उनी सबैका मनमा बस्ने व्यक्ति थिए, र विशेषगरी मेरो लागि। मेलानिया र म उनकी पत्नी एरिका तथा सम्पूर्ण परिवारप्रति हार्दिक संवेदना प्रकट गर्दछौं। चार्ली, हामी तपाईंलाई माया गर्छौं।”

सामूहिक गोलीबारीबारे प्रश्न सोधिँदै गर्दा चलाइयो गोली
घटनास्थलमा रहेका केही व्यक्तिहरूले गार्जियन लाई बताएका अनुसार, चार्लीलाई सामूहिक गोलीबारी (मास शूटिङ) विषयमा प्रश्न सोधिँदै गर्दा गोली हानिएको थियो। कार्यक्रममा रहेकी डेजरेट न्यूज की पत्रकार एम्मा पिट्सका अनुसार, पहिलो प्रश्न थियो— “के तपाईंलाई थाहा छ, पछिल्ला केही वर्षमा कति जना ट्रान्सजेंडर आक्रमणकारी सामूहिक गोलीबारीमा संलग्न थिए?” चार्लीले त्यसको उत्तर दिए। त्यसपछि अर्को प्रश्न आयो— “पछिल्ला १० वर्षमा कति सामूहिक गोलीबारी भएका छन्?” प्रश्न सकिनासाथ गोली चलाइयो।

यसपछि युटा भ्याली युनिभर्सिटी क्याम्पस बन्द गरियो। युनिभर्सिटीका प्रवक्ता एलेन ट्रेनरले न्यूयोर्क टाइम्स लाई बताएअनुसार, चार्लीलाई करिब १८० मिटर टाढाको भवनबाट गोली हानिएको थियो।

पहिले एक जना संदिग्धलाई नियन्त्रणमा लिइएको थियो, तर उनी हमलावर नभएको पुष्टि भएको छ। अहिलेसम्म वास्तविक हमलावर पक्राउ परेका छैनन्। चारवटा निकाय मिलेर घटनाको अनुसन्धान भइरहेको छ।

ट्रम्पलाई पनि २०२४ मा हानिएको थियो गोली 
अमेरिकामा १३ जुलाई २०२४ का दिन पूर्वराष्ट्रपति डोनाल्ड ट्रम्पमाथि पेनसिल्भेनियामा भएको चुनावी सभामा घातक हमला भएको थियो। २० वर्षे आक्रमणकारीले ४०० फिट टाढाबाट ८ राउन्ड गोली चलाएको थियो। तीमध्ये एक गोली ट्रम्पको दायाँ कान छेड्दै गएको थियो। त्यसपछि ट्रम्पको सुरक्षाबारे गम्भीर प्रश्न उठेका थिए। पछि उनी राष्ट्रपति बने।