पोखरा – जिल्ला प्रशासन कार्यालय कास्कीले जेन–जी प्रदर्शनको क्रममा चोरी र लुटपाट गरेको सामान फिर्ता गर्न भनेको छ। फोटो भिडियो हेरेर सामान चोरी गर्ने पहिचान भइरहेकाले फिर्ता गर्न आग्रह गरेको हो।
लुटपाट र चोरीको सामाग्री फिर्ता नगरे कारवाही प्रक्रिया अगाडि बढाउने चेतावनीसमेत दिएको छ। मंगलबार र बुधबार भएको जेन–जी समूहको आन्दोलनमा प्रहरीको हतियारसँगै सामाग्री लुटिएको जिल्ला प्रशासन कार्यालय कास्कीले विज्ञप्ति जारी गर्दै उल्लेख गरेको छ।
‘सरकारी, अर्धसरकारी, निजी सम्पत्ति, व्यापारिक प्रतिष्ठान, होटल, राजनीतिक दलका कार्यालय समेतबाट धनमाल, फर्निचर, ईलेक्ट्रोनिक उपकरण, कम्प्युटर, ल्यापटप, भाँडाकुँडा लुटपाट गरिएका र प्रहरी इकाईबाट हातहतियारसमेतका सामग्री लुटिएका दृश्यहरु तत् तत् निकायका सिसिटिभी फुटेज र सामाजिक सञ्जालमा देखिएका छन्। उक्त दृश्यहरुवाट लुटपाट गर्ने मानिसहरु र सामग्रीहरु लुकाइएका स्थानहरुसमेत पहिचान गर्ने काम भइरहेको छ’, प्रमुख जिल्ला अधिकारी रुद्रादेवी शर्माले जारी गरेको विज्ञप्तिमा भनिएको छ।
लुटपाट गरिएका हातहतियारसहितका सामाग्री जहाँबाट लगेको हो त्यहीँ फिर्ता गर्न अनुरोध गरिएको छ। सिसिटिभी फुटेज र सामाजिक सञ्जालमा अपलोड गरिएका दृश्यहरुबाट लुटपाट गर्ने व्यक्ति र सामग्रीहरु लुकाइएका स्थानको समेत पहिचान भइरहेको जनाइएको छ।
लुटपाट गरिएका सामग्रीहरु र व्यक्ति पहिचान भएपछि प्रचलित कानून बमोजिम अनुसन्धानको दायरामा ल्याई कारबाही प्रक्रिया अगाडि प्रशासनको चेतावनी छ।
भर्खरै
लोकप्रिय
