- एशियाकपको सुपर-४ चरणमा भारत, पाकिस्तान, श्रीलंका र बंगलादेशले स्थान सुरक्षित गरेका छन्।
- श्रीलंकाले अफगानिस्तानलाई १९औँ ओभरमै हराउँदा बंगलादेश पनि सुपर-४ मा चयन भयो।
- कुशल मेन्डिसले नटआउट ७४ रन बनाएर श्रीलंकालाई जित दिलाउँदै बंगलादेशलाई फाइदा पुर्याए।
एशियाकप क्रिकेटको समूह चरण सकिँदै सुपर-४ चरणमा प्रवेश गर्ने सबै चार टिमको टुंगो लागेको छ। बिहीबार भएको खेलमा श्रीलंकाले अफगानिस्तानलाई पराजित गरेसँगै अन्तिम चार टिम निश्चित भएका हुन्।
समूह ‘ए’ बाट भारत र पाकिस्तान तथा समूह ‘बी’ बाट श्रीलंका र बंगलादेश सुपर-४ मा पुगेका छन्।
अबुधाबीमा भएको खेलमा अफगानिस्तानले पहिले ब्याटिङ गर्दै १६९ रन बनाएको थियो। सुपर-४ मा पुग्न श्रीलंकालाई मात्र १०१ रन बनाउनु पर्याप्त थियो। श्रीलंकाले खेल १९औँ ओभरमै जित्दा बंगलादेश पनि भाग्यमानी बनेर सुपर-४ मा प्रवेश गर्न सफल भयो।
समूह चरणमा यो श्रीलंकाको लगातार तेस्रो जित हो। यदि श्रीलंकाले १०१ रन बनाएर पराजित भएको भए अफगानिस्तान नेट रनरेटका आधारमा सुपर-४ मा पुग्थ्यो र बंगलादेश बाहिरिन्थ्यो। तर श्रीलंकासँग पराजित भएपछि अफगानिस्तान प्रतियोगिताबाट बाहिरियो। यससँगै श्रीलंकाले आफूसँगै बंगलादेशलाई पनि सुपर-४ मा पुर्याउन मद्दत गर्यो।
श्रीलंकाको जितमा कुशल मेन्डिसले ७४ रनको नटआउट इनिङ खेले। उनलाई कुशल परेराको २८ रन, कप्तान चरिथ असलंकाको १७ रन र कमिन्दु मेन्डिसको २६ रनको नटआउट इनिङले साथ दिएको थियो।
यसअघि, अफगानिस्तानले खराब सुरुवात गरेको भए पनि सातौँ नम्बरमा आएका मोहम्मद नावीले २२ बलमा ३ चौका र ६ छक्कासहित ६० रनको विस्फोटक इनिङ खेलेका थिए। उनको उत्कृष्ट ब्याटिङकै कारण अफगानिस्तानले प्रतिस्पर्धात्मक स्कोर बनाउन सकेको हो।
भर्खरै
लोकप्रिय
