- गोरखाको अजिरकोट गाउँपालिकामा स्थानीय किसान सञ्जीव लामाले इटालियन स्याउको सफल परीक्षण उत्पादन गरेका छन्।
- गाउँपालिकाले ‘एक वडा एक कृषि फर्म’ कार्यक्रम अन्तर्गत स्याउ, किवी र ट्राउट माछा उत्पादनमा सफलता प्राप्त गरेको छ।
- कृषिलाई आत्मनिर्भर बनाउन गाउँपालिकाले किसानलाई ५०-८० प्रतिशत अनुदान र हाते ट्र्याक्टर वितरण गरेको छ।
गोरखा- गोरखाको अजिरकोट गाउँपालिकामा स्याउको व्यावसायिक खेती सफल भएको छ।
गाउँपालिकाको सहयोगमा स्थानीय किसान सञ्जीव लामाले मूलखर्क स्याउ फर्ममा इटालियन जातका (गोल्डेन डेलिसियस, गाला, र इटालियन फुजी) स्याउको परीक्षण उत्पादन गरेका छन्।
समुद्र सतहबाट २२ सय मिटरको उचाइमा रहेको २० रोपनी जग्गामा गरिएको यो परीक्षणमा स्याउ उत्पादन सफल भएको हो। अब यसलाई व्यावसायिक रूपमा विस्तार गर्ने योजना छ।
त्यसैगरी, गाउँपालिकाले ‘एक वडा एक कृषि फर्म’ कार्यक्रम अन्तर्गत वडा नं. २ मा सञ्चालन गरेका तीनवटै स्याउ फर्ममा पनि सफल परीक्षण उत्पादन भएको छ।
स्याउसँगै किवी र ट्राउट माछाको परीक्षण खेती पनि सफल भएको गाउँपालिकाका अध्यक्ष दीपक देवकोटाले बताए।
गाउँपालिकाले कृषिलाई आत्मनिर्भर बनाउन किसानहरूलाई ५० देखि ८० प्रतिशतसम्म अनुदान दिँदै आएको छ। यसबाहेक, बाँझो खेतमा खेती गर्ने किसानलाई हाते ट्र्याक्टर जस्ता कृषि उपकरण पनि वितरण गरिएको छ।
पशुपालक किसानलाई सहयोग गर्न, पशुहरू बिरामी पर्दा तुरुन्तै सेवा दिन द्रुत प्रतिक्रिया टोली (क्यूआरटी) पनि परिचालन गरिएको छ। साथै, गाउँपालिकाको वडा नं. १ र २ लाई जैविक कृषि उत्पादन क्षेत्र घोषणा गरिएको छ।
तस्बिरहरूः
भर्खरै
लोकप्रिय
