- पेरिस सेन्ट-जर्मेनका उस्मान डेम्बेलेले उत्कृष्ट प्रदर्शन गर्दै पेरिसमा ‘बालोन डि’ओर’ पुरस्कृत भएका छन्।
- डेम्बेलेले पीएसजीलाई च्याम्पियन्स लिगसहित ‘ट्रेबल’ जिताउन उत्कृष्ट योगदान दिए, जसको कारण उनले धेरै प्रशंसा प्राप्त गरे।
- बार्सिलोनाका लामिन यामालले लगातार दोस्रो पटक ‘कोपा ट्रफी’ जिते, स्पेनलाई रोचक खेलमा अघि बढाउन मद्दत गरे।
पेरिस सेन्ट-जर्मेन (पीएसजी) तथा फ्रान्सेली स्ट्राइकर उस्मान डेम्बेलेले पहिलो पटक ‘बालोन डि’ओर’ जित्न सफल भएका छन्। फ्रेन्च क्लब पीएसजीले गत सिजन च्याम्पियन्स लिगसहित ‘ट्रेबल’ उपाधि हात पार्दा डेम्बेलेले उत्कृष्ट प्रदर्शन गरेका थिए।
२८ वर्षीय फरवार्ड डेम्बेलेले गत सिजन पीएसजीका लागि ५३ खेलमा ३५ गोल र १४ असिस्ट गरेका थिए। उनको अद्वितीय प्रदर्शनकै कारण टोलीले च्याम्पियन्स लिग, लिग–१ र फ्रेन्च कप जित्न सफल भयो।
लिग–१ मा उनले २१ गोल गर्दै शीर्ष स्कोररमध्ये एक बनेका थिए र ‘सिजनको उत्कृष्ट खेलाडी’ घोषित भए। उनले च्याम्पियन्स लिगमा पनि ‘सिजनको उत्कृष्ट खेलाडी’ उपाधि पाए। साथै, उनले पीएसजीलाई क्लब वर्ल्ड कपको फाइनलसम्म पुर्याए, जहाँ टोली न्यू जर्सीमा चेल्सीसँग पराजित भएको थियो।
बार्सिलोनाका किशोर खेलाडी लामिन यामाललाई पछि पार्दै डेम्बेलेले ‘बालोन डि’ओर’ जितेका हुन्। सोमबार आफ्नै क्लबको खेल भए पनि उनी पेरिसमा आयोजित कार्यक्रममा सहभागी भए। पुरस्कार ग्रहण गर्दा आमासँगै मञ्चमा उभिएका उनी भावुक बने।
‘मैले अहिले भोगेको क्षण साँच्चिकै असाधारण छ। पीएसजीसँगको मेरो यात्रा शब्दले बयान गर्न सक्दिन। यो ट्रफी जित्नु सजिलो छैन। यसलाई फुटबलका महान् दिग्गज रोनाल्डिन्होले हस्तान्तरण गर्नु अझ विशेष कुरा हो,’ उनले भने।
डेम्बेलेले २०२३ मा पीएसजीले आफूलाई अनुबन्ध गरेकोमा आभार व्यक्त गरे। अध्यक्ष नास्सेर अल–खेलाइफीलाई ‘बुबाजस्तै’ भएको उल्लेख गर्दै उनले प्रशिक्षक र सम्पूर्ण टोलीलाई धन्यवाद दिए। उनले थपे, ‘हामीले सँगै प्रायः सबै कुरा जित्यौं। सुखद र कठिन दुवै क्षणमा साथीहरूबाट पाएको समर्थन अतुलनीय छ। यो व्यक्तिगत ट्रफी वास्तवमा हाम्रो सामूहिक जित हो।’
गर्ड मुलर ट्रफी ग्योकेरेसलाई
आर्सनलका स्ट्राइकर भिक्टर ग्योकेरेसले ‘गर्ड मुलर ट्रफी’ जितेका छन्। यो ट्रफी क्लब तथा देशका लागि एउटै सिजनमा यूरोपेली फुटबलमा सबैभन्दा बढी गोल गर्ने खेलाडीलाई दिइन्छ।
२७ वर्षीय ग्योकेरेसले गत सिजन पोर्चुगाली क्लब स्पोर्टिङका लागि ५२ खेलमा ५४ गोल गरेका थिए। साथै उनले स्वीडेनका लागि नेशन्स लिगका ६ खेलमा ९ गोल पनि गरेका थिए।
लुइस इनरिके ‘टप म्यानेजर’
२०२४–२५ मा उत्कृष्ट पुरुष प्रशिक्षकको ट्रफी पेरिस सेन्ट-जर्मेन (पीएसजी) का लुइस इनरिकेले जितेका छन्।
५५ वर्षीय स्पेनिस प्रशिक्षकले आफ्नो टोलीलाई पहिलो पटक च्याम्पियन्स लिगसहित ट्रेबल जिताउन नेतृत्व गरे। उनले यो उपलब्धि सिजनको सुरुवातमै स्टार खेलाडी एमबाप्पेलाई फ्री ट्रान्सफरमा गुमाएको अवस्थामै हासिल गरेका थिए।
पूर्व बार्सिलोना प्रशिक्षक इनरिके दुई फरक क्लबसँग ट्रेबल जित्ने दोस्रो व्यक्ति बनेका छन्। यसअघि यो कीर्तिमान पेप ग्वार्डिओलाले मात्र बनाएका थिए।
डोनारुम्मा ‘उत्कृष्ट गोलरक्षक’
इटालीका जियानलुइजी डोनारुम्माले उत्कृष्ट गोलरक्षकको उपाधि जितेका छन्। अहिले म्यानचेस्टर सिटीमा आवद्ध उनी ‘यासिन ट्रफी’ विजेता बने।
२६ वर्षीय डोनारुम्माले पीएसजीका लागि गत सिजन ४७ खेलमा १७ ‘क्लिन सिट’ राखेका थिए। त्यसपछि उनी २६ मिलियन पाउन्डमा म्यानचेस्टर सिटीमा आवद्ध भए। उनले यसअघि पनि २०२१ मा यो ट्रफी जितेका थिए, जब उनी युरो २०२० को ‘टुर्नामेन्टको उत्कृष्ट खेलाडी’ घोषित भएका थिए।
यामाललाई लगातार दोस्रो वर्ष ‘कोपा ट्रफी’
बालोन डि’ओरको दाबेदार मानिएका बार्सिलोनाका किशोर खेलाडी लामिन यामालले लगातार दोस्रो वर्ष ‘कोपा ट्रफी’ जितेका छन्। यो पुरस्कार २१ वर्ष मुनिका उत्कृष्ट खेलाडीलाई दिइन्छ। सन् २०१८ मा सुरु गरिएको यो पुरस्कार दुई पटक जित्ने उनी पहिलो खेलाडी बनेका छन्।
गत सिजन यामालले स्पेनलाई घरेलु ‘डबल’ जिताउन मद्दत गरेका थिए। उनले क्लबलाई ला लिगा र कोपा डेल रे उपाधि जिताउन महत्वपूर्ण योगदान दिए। ५५ खेलमा १८ गोल गर्दै २१ असिस्ट गरेका उनले तीन फरक ‘क्लासिको’मा पनि गोल गरेका थिए।
त्यस्तै, उनले स्पेनलाई नेशन्स लिगको फाइनलसम्म पुर्याए। सेमिफाइनलमा उस्मान डेम्बेलेको फ्रान्सविरुद्ध ५–४ को रोमाञ्चक जित दिलाउँदा उनले दुई गोल गरेका थिए। तर फाइनलमा स्पेन पोर्चुगालसँग पेनाल्टीमा पराजित भयो।
भर्खरै
लोकप्रिय
