काठमाडौँ- भदौ २३ र २४ गते भएका जेनजी प्रदर्शन र हिंसा तथा तोडफोडलगायतका घटनाको छानबिन गर्न बनेको आयोगका अध्यक्ष गौरीबहादुर कार्कीले त्यस्ता घटनामा छानबिन गर्न आयोगको प्रतिवेदन कुरिरहन नपर्ने बताएका छन्।
यसअघि गृहमन्त्रालयले भने २३ र २४ का घटनामा प्रतिवेदनअगाडि कारबाही नगर्न सम्बन्धित निकायलाई निर्देशन दिएको थियो। गृहमन्त्रालयले जारी गरेको त्यस्तो निर्देशनको चौतर्फी विरोध भएको थियो।
आयोग अध्यक्ष कार्कीले भने भदौ २३ र २४ गते भएका फाैजदारी कानुन आकर्षित हुने घटनाको छानबिन गर्न नियमित कानुनी प्रक्रियाबाट कुनै अवरोध नहुने बताएका छन्। अध्यक्ष कार्कीले भनेका छन्- ‘फाैजदारी अभियाेगमा अनुसन्धान र कारबाही गर्नका लागि जाँचबुझ आयाेगकाे प्रतिवेदन कुर्नु पर्दैन, नियमित प्रक्रियामा अनुसन्धान तहकिकात गर्न अवरोध छैन, तालुक निकायका नियमित फाैजदारी अनुसन्धान राेक्ने आयाेगकाे प्रक्रियामा पर्दैन।’
यसअघि गृहको विज्ञप्तिमा ‘आयोगको कार्यक्षेत्रमा रहने विषयमा सरकारका नियमित संयन्त्रबाट तत्काल कारबाही अगाडि नबढाइने’ भन्दै नियमित कानुनी प्रक्रिया अगाडि बढाइरहेका प्रहरीलगायत निकायलाई निरुत्साहित गरिएको थियो।
भर्खरै
लोकप्रिय
