नेपालले इरानविरुद्धको खेलको पहिलो हाफमा गोल हुन नदिए पनि दोस्रो हाफमा तीन गोल खायो।
इरानले नेपालविरुद्धको जितमा साहारा, जहारा र शबनमका उत्कृष्ट प्रदर्शनले निर्णायक भूमिका खेले।
पहिलो चरणको खेलमा इरानले भारतलाई २–० ले पराजित गर्दै आफ्नो मजबुत स्थिति कायम गरेको थियो।
काठमाडौं – नेपाल, भारत र इरान सम्मिलित त्रिदेशीय महिला फुटबल प्रतियोगितामा नेपाल इरानसँग ३–० को फराकिलो अन्तरले पराजित भएको छ। पहिलो हाफ गोलरहित बराबरी भएको खेलमा दोस्रो हाफमा इरानले खेलमा अग्रता बनाएको थियो।
इरानी टोलीले पहिलो हाफमा अधिकांस समय खेल नियन्त्रणका बाबजुत गोल गर्न सकेको थिएन्। तर, दोस्रो हाफ सुरु भएको केही क्षणमै नेपाल गोल खान पुग्यो। खेलको ४९ औं मिनेटमा इरानले अग्रता लियो। गोलरक्षकको लामो पासलाई नेपाली डिफेन्डरले रोक्न नसक्दा साहारा दिदरले गोलरक्षक एञ्जीलालाई बिट गर्दै टिमलाई सुरुवाती अग्रता दिलाइन्।
पहिलो गोल खाएको तीन मिनेटपछि नै नेपालले दोस्रो गोल खायो। ५२ औं मिनेटमा डिबक्स बाहिर पाएको फ्रिकिकलाई इरानी कप्तान जहाराले सिधै गोलमा परिणत गरिन्। दोस्रो बार च्यापेर उनले गरेको आकर्षक प्रहारलाई गोलरक्षक एञ्जीलाले प्रयास गरे पनि बल उनको हातमा लाग्दै गोलमा परिणत भएको थियो।
इरान यतिमै रोकिएन खेलको ५७ औं मिनेटमा मेलिकाको पासमा शबनमले डिबक्स बाहिरबाट गरेको प्रहारले उत्कृष्ट गोलको रुप लियो। उक्त प्रहारको समयमा गोलरक्षक एञ्जीला केही अगाडि बढेको र बललाई सहि जज गर्न नसक्दा नेपालले ८ मिनेटभित्रै तेस्रो गोल खान पुग्यो। त्यसपछि पनि इरानले राम्रा अवसर बनाएको थियो।
नेपाल भने केही सिमित मौकामा गोल गर्न चुकेको थियो। बाँकी समयमा थप गोल हुन नसकेपछि नेपाल इरानसँग ३–० को हार ब्यहोर्न बाध्य भयो। यसअघि पहिलो खेलमा इरानले भारतलाई २–० ले पराजित गरेको थियो।
भर्खरै
लोकप्रिय
