मुगु – मध्यपश्चिमाञ्चल विश्वविद्यालयअन्तर्गत स्ववियु निर्वाचनमा रारा बहुमुखी क्याम्पस, मुगुमा नेपाल विद्यार्थी संघ (नेविसंघ) ले सभापति पदसहित उल्लेखनीय जित हासिल गरेको छ।
सोमबार सम्पन्न निर्वाचनमा जम्मा १७२ मतदाता रहेकोमा १४५ मत खसेको थियो। जसमा नेविसंघकी सभापति उम्मेदवार जयलक्ष्मी रावलले ७३ मत प्राप्त गर्दै विजयी भइन्। उनका प्रतिद्वन्द्वी अनेरास्ववियु र अखिल क्रान्तिकारीका साझा उम्मेदवार रविन्द्र मल्लले ४८ मत प्राप्त गरे भने स्वतन्त्र उम्मेदवार सुशील मल्लले १७ मत पाए।
अन्य पदहरूमा पनि रोचक प्रतिस्पर्धा देखियो। अखिल क्रान्तिकारीका सचिव उम्मेदवार औसरा बुढाले ११० मत प्राप्त गरी विजयी भइन्। नेविसंघका कोषाध्यक्ष उम्मेदवार पञ्चलक्ष्मी सेजुवालले ७६ मत प्राप्त गर्दै जित हात पारिन्। सदस्य पदमा अखिल क्रान्तिकारीका मनोज शाही ६७ मतसहित विजयी भए भने अनेरास्ववियुकी रेखा कार्कीले ६३ मत प्राप्त गरिन्।
निर्वाचन अधिकृत लालकेशर रोकायाका अनुसार समानुपातिक मत गणनामा अखिल क्रान्तिकारीले ९ मत, अनेरास्ववियुले ६५ मत, नेविसंघले ५८ मत र राष्ट्रिय प्रजातान्त्रिक विद्यार्थी संगठनले ६ मत प्राप्त गरेका छन्। ७ मत बदर भएको छ।
स्ववियु निर्वाचनमा अनेरास्ववियु र अखिल क्रान्तिकारीबीच गठबन्धन रहेको थियो भने नेविसंघको असन्तुष्ट समूहले स्वतन्त्र उम्मेदवारी दिएको थियो। निर्वाचनपछि विजयी उम्मेदवारहरूले विद्यार्थीहरूको हकहितका लागि प्रतिबद्ध भएर काम गर्ने बताएका छन्।
भर्खरै
लोकप्रिय
