मुगु – यार्सा संकलन गर्न गएका एक युवक कर्णाली नदीमा खसेर बेपत्ता भएका छन्। मुगु जिल्लाको मुगुम कार्मारोङ गाउँपालिका–५ सेरोग गाउँका ४० वर्षीय सेराप साङ्बु लामा बिहीबार बिहान यार्सा संकलनका लागि घरबाट निस्किएका थिए।
बेपता भएका लामा र उनका साथीहरू सोही गाउँपालिकाको वडा नम्बर २ स्थित सिरानी चौर पुगेर पाटन क्षेत्रमा यार्सा संकलनका लागि जाँदै गर्दा बुधबार राति करिब ८ः३० बजे कर्णाली नदीमाथि राखिएको काठको लाप्को (साँघुरो पुल) तर्दै गर्दा लामा चिप्लिएर नदीमा खसेको जिल्ला प्रहरी कार्यालय, मुगुले जनाएको छ। खसेपछि उनी बेपत्ता भएका हुन्।
मुगुम कार्मारोङ गाउँपालिकाले यार्सा संकलनका लागि वन क्षेत्र जेठ १३ गतेबाट मात्रै खुला गर्ने सूचना जारी गरेको भए पनि स्थानीयले पालिकाको निर्देशनको उल्लङ्घन गर्दै यसअघि नै सर्वसाधारणलाई पाटन क्षेत्रमा प्रवेश गराउन थालेका थिए। सोही क्रममा केही युवक बुधबारै यार्सा संकलनका लागि पाटन क्षेत्रतर्फ हिँडेका थिए।
गाउँपालिकाका उपाध्यक्ष छिरिङ पुटिक तामाङले पनि सेराप लामा कर्णाली नदी पार गर्ने क्रममा चिप्लिएर खसेको बताइन्। जिल्ला प्रहरी कार्यालयका अनुसार घटनाको जानकारी प्राप्त भएलगत्तै खोजी कार्य ब्यापक पारिए पनि हालसम्म उनी कतै फेला नपरेको प्रहरीले बताएको छ।
भर्खरै
लोकप्रिय
