काठमाडौँ – नेपाली कांग्रेसका सभापति शेरबहादुर देउवाले पेट्रोलियम पदार्थको प्रयोग घटाउँदै स्वदेशमै उत्पादन हुने स्वच्छ विद्युत प्रयोग गर्नु अबको आवश्यकता भएको बताएका छन्।
आइतबार पार्टी केन्द्रीय कार्यालय, सानेपामा आयोजित वातावरण तथा जलवायु परिवर्तन सरोकार संवाद कार्यक्रमलाई सम्बोधन गर्दै उनले विद्युतको प्रयोगले व्यापार घाटा घटाउने मात्रै नभई अर्थतन्त्रमा पनि सकारात्मक प्रभाव पार्ने बताए।
उनले पेट्रोलियम पदार्थको सट्टा विद्युतबाट नै धेरै कामहरु गर्न सकिने बताए। सभापति देउवाले विद्युतीय सवारीहरुको प्रयोग बढाउनुपर्ने र विद्युतीय सामाग्रीहरु पनि बढी उपयोग गर्न जरुरी रहेको बताए। यसले जलवायु परिवर्तनका असर न्यूनीकरणमा मद्दत पुग्ने उनको भनाइ छ।
‘पेट्रोलियम पदार्थको प्रयोग घटाउँदै स्वदेशमै उत्पादन हुने स्वच्छ विद्युत प्रयोग गर्नु अबको आवश्यकता पनि हो। तसर्थ व्यापार घाटामा मात्र होइन, अर्थतन्त्रमा पनि यसले सकारात्मक प्रभाव पार्नेछ,’ उनले भने।
सभापति देउवाले विद्यालय, विश्वविद्यालयमा जलवायु शिक्षा, बाढी प्रभावित क्षेत्रमा पूर्वसूचना प्रणाली, सुख्खा तराई क्षेत्रमा सिंचाइ र स्वच्छ खानेपानीको व्यवस्था, पहिरो प्रभावित पहाडी क्षेत्रमा भूक्षय रोकथाम कार्यान्वनय, हिमतालहरुको संरक्षणका साथै हिमालको फोहोर व्यवस्थापनमा स्थानीय जनस्तरसम्म पुग्ने अनुकुलका कार्यक्रमहरु सञ्चालन गर्न जरुरी रहेको बताए।
भर्खरै
लोकप्रिय
