काठमाडौँ- महाभारतका महापात्र कर्णबारे लेखिएको उपन्यास ‘सूतपुत्र’ सार्वजनिक भएको छ ।
पूर्वीय दर्शनमा कलम चलाउँदै आएका पाल्पाका प्राध्यापक तथा साहित्यकार डा. शङ्करप्रसाद गैरेद्वारा लिखित यस उपन्यासमा कर्णले विभेदयुक्त परिवेशमा बाँच्न गरेको सङ्घर्ष र त्यसको उपलब्धीलाई चित्रण गरिएको छ ।
महाभारतको जगमा मिथकीय पात्र र परिवेशको व्याख्या गरिएको विशद उपन्यास सूतपुत्र लेख्नलाई कर्णको सङ्घर्षपूर्ण जीवन र पात्रताले बल प्रदान गरेको लेखक गैरे बताउँछन् । उनी भन्छन्, “सूतपुत्र पौराणिक आख्यानमात्र होइन, समाजमा युगौंदेखि जरा गाडेको जातीय अतिवाद विरुद्धको आवाज हो । मानवताको आग्रह हो । प्रेम, मित्रता, इमानको अभिव्यक्ति हो । मेरो लामो साधनाको प्रतिफल यस उपन्यासले नेपाली साहित्यमा एउटा नयाँ बहसको आरम्भ गर्नेछ र न्यानो स्वागत, सम्मान पाउनेछ भन्ने विश्वास छ ।”
उपन्यासबारे लेखक तथा कर्णकै विषयमा महाकाव्यको सृजना गरेका डा. नवराज लम्साल भन्छन्, “जीवनमा पटक-पटक हारेर पनि आत्मा नहार्ने ताकत भएका पात्र हुन् कर्ण ! च्यातिँदा च्यातिँदा पनि नसकिने तर च्यात्नेहरूभन्दा माथिको प्राप्तिलाई प्रेरणामा बदल्ने ल्याकत भएका मिथकीय पात्रलाई दलनको आँखाबाट गरिएको व्याख्या अति सुन्दर छ । आख्यानमा शङ्करप्रसाद गैरेको जबर्जस्त हस्तक्षेत हो यो । यसले आफ्नो इतिहास बनाउनेछ ।”
पौराणिक कथाका माध्यमबाट जातीय सबाल्टर्नलाई उत्खनन गर्ने २६० पृष्ठको सूतपुत्रको बजारमूल्य ६०० रुपैयाँ रहेको छ । उपन्यास बुकहिल पब्लिकेशनले प्रकाशन गरेको हो ।
भर्खरै
लोकप्रिय
