झापा- आफ्नै हजुरआमालाई पैसा नदिएको रिसमा खुकुरी प्रहार गरी घाइते बनाएर फरार रहेका एक युवक करिब दुई महिनापछि पक्राउ परेका छन् ।
पक्राउ पर्नेमा भद्रपुर-१०, सत्रबिगेका २७ वर्षीय महेश सुवेदी रहेका छन् । उनले गत असार १२ गते बिहान एक्लै बस्दै आएकी ७२ वर्षीया हजुरआमा खिनमाया सुवेदीसँग पैसा माग्दा नदिएपछि खुकुरीले आक्रमण गरी घाइते बनाएका थिए ।
घटनालगत्तै फरार भएका सुवेदीलाई जिल्ला प्रहरी कार्यालय झापाबाट खटिएको प्रहरी निरीक्षक विजय चौहानको टोलीले सोमबार साँझ ५:३० बजे उनको आफ्नै घरबाटै पक्राउ गरेको हो । उनलाई अहिले जिल्ला प्रहरी कार्यालयमा ल्याएर थप अनुसन्धान भइरहेको छ ।
जिल्ला प्रहरी कार्यालयका डीएसपी खगेन्द्र खड्काका अनुसार, सुवेदीविरुद्ध ज्यान मार्ने उद्योगमा मुद्दा दर्ता गरी पक्राउ पुर्जी जारी भइसकेको थियो ।
उनलाई थप अनुसन्धानका लागि भोलि जिल्ला अदालतमा म्याद थप गर्न लगिने डीएसपी खड्काले जानकारी दिए ।
भर्खरै
लोकप्रिय
