- चालु आर्थिक वर्षको पहिलो महिनामा व्यापार घाटा रु १ खर्ब १९ अर्ब ११ करोड पुगेको छ, जो २.५ प्रतिशतले वृद्धि भएको हो।
- कूल वस्तु आयात ११.४ प्रतिशतले बढ्दा भटमासको कच्चा तेल, यातायात उपकरण र कोइला जस्ता वस्तुको आयात वृद्धि भएको छ।
- निर्यात ९५.७ प्रतिशतले बढेर रु २३ अर्ब ९३ करोड पुगेको छ, विशेषगरी भारततर्फ १५६.७ प्रतिशत वृद्धिको योगदान छ।
काठमाडौँ- चालु आर्थिक वर्ष २०८२/८३ को पहिलो महिनामा मुलुकको व्यापार घाटा रु १ खर्ब १९ अर्ब ११ करोड पुगेको छ । नेपाल राष्ट्र बैंकले सोमबार सार्वजनिक गरेको विवरणअनुसार यो घाटा अघिल्लो वर्षको सोही अवधिभन्दा २.५ प्रतिशतले बढेको हो ।
गत साउन महिनामा कूल वस्तु आयात ११.४ प्रतिशतले बढेर रु १ खर्ब ४३ अर्ब ४ करोड पुगेको छ । अघिल्लो वर्ष सोही अवधिमा आयातमा ०.६ प्रतिशतले कमी आएको थियो । आयात मुलुकका आधारमा हेर्दा भारतबाट ७.५ प्रतिशत, चीनबाट १४.१ प्रतिशत, र अन्य मुलुकबाट २०.५ प्रतिशत वृद्धि भएको छ ।
वस्तुगत आधारमा भटमासको कच्चा तेल, यातायात उपकरण, सवारीसाधन तथा स्पेयर पार्टस्, चामल/धान, कोइला, रासायनिक मलजस्ता वस्तुको आयात बढेको छ भने हट रोल्ड सिट इन क्वाइल, खाने तेल, पेट्रोलियम पदार्थ, अन्य मेसिनरी पार्टस् र तेलहनको आयात घटेको छ ।
समीक्षा अवधिमा कूल वस्तु निर्यात भने ९५.७ प्रतिशतले बढेर रु २३ अर्ब ९३ करोड पुगेको छ । अघिल्लो वर्ष सोही अवधिमा निर्यात ९.६ प्रतिशतले घटेको थियो । गन्तव्यका आधारमा भारततर्फ निर्यात १५६.७ प्रतिशतले बढेको छ भने चीनतर्फ ६५.२ प्रतिशत र अन्य मुलुकतर्फ १.४ प्रतिशतले घटेको छ ।
वस्तुगत आधारमा भटमासको तेल, पाम तेल, पोलिस्टर धागो, अलैँची र जुटका सामानको निर्यात बढेको छ भने जिङ्क सिट, पार्टिकल बोर्ड, ऊनी गलैंचा, पिना र चियाको निर्यात घटेको छ ।
समीक्षा अवधिमा निर्यात–आयात अनुपात १६.७ प्रतिशत पुगेको छ, अघिल्लो वर्ष यो अनुपात ९.५ प्रतिशत मात्र थियो । यस अवधिमा भारतबाट परिवत्र्य विदेशी मुद्रा भुक्तानी गरी रु १३ अर्ब ४३ करोड बराबरको वस्तु आयात गरिएको छ, जुन अघिल्लो वर्षको सोही अवधिमा रु १३ अर्ब ९८ करोड थियो ।
भर्खरै
लोकप्रिय
