- गृह तथा कानुनमन्त्री ओमप्रकाश अर्यालले विदेशमा रहेका नेपालीलाई समानुपातिक निर्वाचन प्रणालीमा मतदान गर्ने व्यवस्था गरिने बताएका छन्।
- प्रविधिको प्रयोग गरेर मतदानको व्यवस्था गर्न राजदूतावासलाई समेत समेट्ने योजना रहेको उनले उल्लेख गरे।
- युवा पुस्तालाई राजनीतिको मूलधारमा ल्याउने उद्देश्यले प्रविधिको प्रयोग गरी उनीहरूलाई मतदानको अवसर दिनुपर्ने धारणा राखे।
काठमाडौं- गृह तथा कानुनमन्त्री ओमप्रकाश अर्यालले आगामी निर्वाचनमा विदेशमा रहेका नेपालीहरूले पनि मतदान गर्न सम्भव बनाउन लाग्ने बताएका छन्।
निर्वाचन आयोगमा बिहीबार भएको छलफलमा भाग लिने क्रममा मन्त्री अर्यालले समानुपातिक निर्वाचन प्रणालीमा भए पनि मतदान गर्न पाउनुपर्ने माग बढेको उल्लेख गर्दै सम्भव बनाउनुपर्ने बताएका हुन्। सर्वोच्च अदालतले विदेशमा रहेका नेपालीलाई पनि मतदानको व्यवस्था गर्न सरकारका नाममाा आदेश गरेको थियो।
मतदानको पूर्ण सम्भावना नभएका देशहरूमा राजदूतावासमार्फत प्रविधिको प्रयोग गरेर मतदानको व्यवस्था गराउनुपर्ने पनि गृहमन्त्री अर्यालले बताए।
राज्यले पनि प्रविधिको प्रयोग गरेर युवा पुस्तालाई राजनीतिको मूलधारमा ल्याउने प्रयास गरौं भन्ने छ, उहाँहरूलाई हामीले निर्वाचनमा मतदान गर्ने अवसरबाट बञ्चित गर्न हुँदैन। नेपाल सरकारबाट गर्न सक्ने हामीले गर्छौं, मलाई लाग्छ निर्वाचन आयोगले पनि यसमा सहजीकरण गर्नेछ,’ उनले छलफलका क्रममा भने।
भर्खरै
लोकप्रिय
