पद्यश्री गौरब पुरस्कारबाट पुरस्कृत सुवेदी भन्छन्, ‘म राजनीतिलाई सांस्कृतिक अध्ययनको विषय ठान्छु’

काठमाडौं- पद्यश्री गौरब पुरस्कार प्रध्यापक डाक्टर अभि सवेदीलाई प्रदान गरिएको छ । यसैगरी पद्यश्री पुरस्कार लेखक पत्रकार रमेश भुसाललाई र पद्यश्री साधाना सम्मान नेपाली शिक्षा परिषद्की अध्यक्ष रमा शर्मालाई प्रदान गरिएको हो । लेखक भुसाललाई ‘छालबाटो’ यात्रा निबन्ध प्रदान गरिएको छ ।

खेमलाल हरिकला लामिछाने समाज कल्याण प्रतिष्ठानका अध्यक्ष जीवा लामिछानेले नेपाली र अंग्रेजी भाषामा कलम चलाउने निबन्धकार, समालोचक, भाषाविद् नाटककार, अनुवादक तथा कवि अभि सुवेदीलाई प्रदान गरेकोमा खुसी भएको बताए । सुवेदीका करिब तीन दर्जन कृति प्रकाशित छन् । उनी साहित्य सिर्जना तथा समसामयिक लेखनमा अत्यन्तै सक्रिय छन् । करिब ४० वर्ष त्रिविविमा प्राध्यापन गरेका सुवेदीले युगकवि सिद्धिचरण पुरस्कार, सार्क साहित्य पुरस्कारसहित अनेकौं सम्मान प्राप्त गरेका छन् ।”

साहित्य लेखनलाई एक बहुपक्षीय साधना मान्ने सुवेदीले कार्यक्रममा आफ्नो शिक्षण पेशा र लेखन अनुभव साटेका थिए । ‘मलाई साहित्य र कलाका मीमांसा मन गर्छन् । चित्रकलामा पनि त्यस्तै रुचि छ। र म राजनीतिलाई सांस्कृतिक अध्ययनको विषय ठान्छु । मलाई आफ्ना विचार र अभिव्यञ्जना राख्न दिनुभएकोमा धन्यवाद,’ सुवेदीले भने ।

प्रत्येक वर्ष नेपाली साहित्य संगीत र कलाको क्षेत्रमा दीर्घसाधना गरेर उत्कृष्ट योगदान पुर्याएका दीर्घसाधकलाई प्रदान गरिने पद्यश्री साधना सम्मान रमा शर्मार्लाइ प्रदान गर्न पाएको खुसी अध्यक्ष लामिछानेले बताए ।

आफ्‌नो सम्पूर्ण जीवन भाषा, साहित्य, संस्कृति र कलाको उन्नयनमा समर्पित रमा शर्माका अन्वेषण, समालोचना, जीवनी, निबन्ध, भाषा, बालसाहित्य लगायतका करिब दुई दर्जन पुस्तकहरू प्रकाशित छन् ।

लेखक भुसालले कार्यक्रममा आफ्ना पारिवारक दुःख लेखन यात्रा र नदी सभ्यता र पर्यावरणमा परेको असरबारे बोलेका थिए । आफू नजन्मिदै बुवा नदीमा हाम फालेर गएपछि कहिल्यै नफर्किएको स्मरण गर्दै उनले भने, ‘मेरो जीवनमा नदी म नजन्मिदैदेखि जोडिएको छ । नदीले मलाई दुःख पनि दिएको छ र आनन्द पनि । छालबाटो केवल नदीको कथा होइन यो नदी किनारमा बाँच्ने पात्रहरुको कथा हो ।’

हरेक बर्ष कोजाग्रत पूर्णिमाको दिन बिशेष समारोहका बीच भएको कार्यक्रममा कवि तुलसी दिवसले विद्वत बचन सुनाएको थिए ।