इजरायलबाट हमासको अपहरणमा परेका नेपाली युवा विपिन जोशी करिब दुई वर्षअघि नै मारिएको इजरायली रक्षा बल (आइडिएफ) ले जनाएको छ।
आईडीएफले प्राप्त गरेको जानकारी साझा गर्दै उसले प्रारम्भिक मूल्यांकनमै उनको मृत्यु अपहरण परेको केही महिनामै भएको बताएको छ।
जोशीलाई हमासले इजरायलको किबुत्ज अलुमिमबाट २३ वर्षको उमेरमा नियन्त्रणमा लिएको थियो। प्रारम्भिक मूल्यांकनअनुसार, युद्धको पहिलो केही महिनाभित्रै उनको बन्दी अवस्थामै हत्या गरिएको आइडिएफले बताएको छ।
मृत्युको कारण र परिस्थितिहरूको अन्तिम निष्कर्ष आइनसकेको र आईडिएफले मृतक परिवारप्रति गहिरो समवेदना प्रकट गरेको छ। साथै उसले बाँकी सबै बन्धकहरूको फिर्ताका लागि आफ्नो प्रयास जारी राखेको बताएको छ। हमासले सम्झौताअनुसार आफ्नो जिम्मेवारी पूरा गर्दै सबै बन्धकहरूलाई उनीहरूको परिवारका बीचमा र उचित अन्त्येष्टिका लागि फिर्ता गराउन आवश्यक पहल गर्न पनि आइडिएफले आग्रह गरेको छ।
युद्धविराम सम्झौताले २० जना इजरायली जीवित बन्धक र चार जना मृतक बन्धकको शब इजरायललाई हस्तान्तरण भएको छ। साथै सयौँ प्यालेस्टिनी कैदीहरूलाई आफ्ना परिवारसँग भावनात्मक रूपमा पुनर्मिलन गराइएको छ।
शोकाकुल इजरायली परिवारहरूले २८ जना मृतक बन्धकमध्ये हालसम्म केवल चार जनाका मात्र शव फिर्ता गरिएको भन्दै आलोचना गरेका छन्।
इजरायली मिडियाले प्रकाशित गरेको युद्धविराम सम्झौतामा उल्लेख भएअनुसार हमास र अन्य प्यालेस्टिनी समूहहरूले तोकिएको समयभित्र सबै शवहरूको ठेगाना पत्ता लगाउन नसक्ने सम्भावनालाई भने इजरायलले स्वीकार गरेको छ।
भर्खरै
लोकप्रिय
