काठमाडौँ – पोखरामा बलात्कारपछि हत्या गरिएकी श्रेया बिकको हत्यारा पत्ता लगाउने कुकुरले ‘वेष्ट डग अफ द एयर’ अवार्ड प्राप्त गरेको छ ।
असोज ८ गते पसल जाँदै गरेकी १० वर्षीय श्रेया सुनारलाई बलात्कार प्रयासपछि हत्या गरेका २७ वर्षीय कुसुम पौडेल घटना भएको २४ घण्टाभित्रै पक्राउ परेका थिए ।
सो घटनाका आरोपी कुसुमलाई पत्ता लगाउने जर्मन शेफर्ड जातको कुकुर कुशललाई घटनामा प्रयोग भएको ढुंगा सुँघाइएको थियो ।
त्यहि ट्रयाकअनुसार प्रहरी अभियुक्तसम्म पुग्न सफल भएको थियो । कुशलले कुकुर स्कुल स्थापना भएको ५० वर्षको अवसरमा ‘बेस्ट डग अफ द एयर’ को सम्मान पाएको छ ।
कुशलले ११ असोजमा पोखरामा हत्या गरिएकी ६० वर्षीया श्रीमाया गुरुङको अभियुक्तलाई पनि पक्राउ गराउन सफल भएको थियो ।
घर बाहिर बारीमा हत्या गरी छोपेर राखिएको अवस्थामा भेटिएको शवको छेवैमा रहेको ढुंगा र हँसियालाई सुँघेपछि कुशलले प्रहरीलाई अभियुक्त सम्म पुर्याएको थियो ।
गन्ध पहिल्याउँदै अघि बढ्ने क्रममा कुशलले प्रहरीलाई ४ किलोमिटर पर चोकबाट भित्रपट्टी रहेको धानबारीसम्म पुर्याएको थियो । जहाँ अभियुक्त यमबहादुर गुरुङ लुकेर बसेका थिए ।
त्यसै गरी फेवातालमा हाम फालेर आत्महत्या गरेकी पुम्दिभुम्दिकै सुस्मिता लामिछानेको पनि झोला मार्फत उनको शब सम्म पुग्न दिशा निर्देश गरेको थियो । यो वर्ष दुई वटा हत्या र एक आत्महत्याको घटनामा कुशलले प्रहरीलाई सफलता दिलाएको थियो ।
गण्डकी प्रदेशमा ८ वटा तालिम प्राप्त कुकुरहरु रहेका छन् । देशभरी प्रहरी कार्यालयमा झण्डै ८० वटा तालिम प्राप्त कुकुर रहेकोमा यो वर्ष गण्डकी प्रदेशको कुशल ले सर्वोत्कृष्ट अवार्ड पाउन सफल भएको कुकुर शाखाका प्रहरी नायव निरीक्षक बिक्रम थापाले जानकारी दिए ।
चार वर्षदेखि प्रहरी अनुसन्धानमा सेवारत कुशल आज्ञापालन र अपराधिको खोजीका कारण अनुसन्धान अधिकारीहरुमाझ प्रिय रहेको थापाको भनाई छ ।
भर्खरै
लोकप्रिय
